Vıtse-premer qýańshylyq bolýy múmkin óńirlerdi atady
ASTANA. KAZINFORM – Premer-Mınıstrdiń orynbasary Serik Jumanǵarın Májilistiń jalpy otyrysynan keıin bolǵan brıfıngide qýańshylyq bolýy múmkin óńirlerdi atady
«Qazgıdromet» boljamdaryn sál jańartqanyn bilesizder. Bıyl qýańshylyq Qostanaı oblysynyń Amangeldi, Jangeldın aýdandarynda bolýy múmkin. Men ol eki aýdandy aralap óttim. Jangeldın aýdan Qostanaı oblysynyń eń ońtústigindegi ólke. Ol jaqta egin egý boıynsha eshqandaı qater joq. Óıtkeni Amangeldi aýdanynda da, Jangeldi aýdanynda da eshkim úlken kólemde egin ekpeıdi. Halyqtyń negizgi bóligi mal sharýashylyǵymen aınalysady. Qostanaı oblysyndaǵy dıqandardyń negizgi massıvi Arqalyqtan soltústikte jatyr. Sondyqtan «Qazgıdromettiń» deregi boıynsha eshqandaı qaýip joq. Soltústik Qazaqstan, Aqmola oblystarynda da solaı. Beınelep aıtsaq, astyqtyń 90 paıyzyn beretin óńirler ǵoı», - dedi ol.
S.Jumanǵarın Aqtóbe oblysynda da qýańshylyq bolýy múmkin ekenin aıtty.
«Bálkim Aqtóbe oblysynyń Qarǵaly, Muǵaljar aýdandarynda problema bar shyǵar. Osy aýdandarda qýańshylyq bolýy múmkin delinip otyr. Qarǵaly aýdany Aqtóbe oblysyndaǵy egin shyǵymyna áser etýi múmkin. Biraq Muǵaljar aýdany emes. Ol da maldy aýyl», - dedi vıtse-premer.
