Vıtse-premer BQO-da salyq reformasy men ınvestıtsııalyq qoldaý tetikterin tanystyrdy
ASTANA. KAZINFORM — Batys Qazaqstan oblysyna jumys sapary aıasynda Premer-mınıstrdiń orynbasary — ulttyq ekonomıka mınıstri Serik Jumanǵarın óńirlik bıznes ókilderimen kezdesý ótkizdi, dep habarlaıdy vedomstvonyń baspasóz qyzmeti.
Jańa Konstıtýtsııa jobasynyń negizgi qaǵıdalary, Salyq kodeksiniń qoldanysqa engizilýi, proaktıvti ekonomıkalyq saıasat quraldary, sondaı-aq kásipkerlerdiń naqty máseleleri talqylandy.
Jańa Konstıtýtsııa jobasy — ekonomıkany damytý, memlekettik basqarýdy jetildirý, azamattardyń quqyqtary men bostandyqtaryna kepildik berý
Kezdesýdiń birinshi bóliginde vıtse-premer jańa Konstıtýtsııa jobasynyń negizgi baǵyttaryna jan-jaqty toqtaldy. Atap aıtqanda, ekonomıkany damytý, memlekettik basqarý júıesin jetildirý, azamattardyń quqyqtary men bostandyqtaryna kepildik berý, strategııalyq josparlaý tetikteri men memlekettik júıeniń turaqtylyǵyn qamtamasyz etý máseleleri sóz boldy. Ekonomıkalyq damýǵa erekshe basymdyq berilgeni atap ótildi.
— Bilim berý, ǵylym, ınnovatsııalar men adamı kapıtaldy damytý memlekettiń strategııalyq basym baǵyty retinde aıqyndalady. Básekege qabilettilik deńgeıi zııatkerlikke, tehnologııaǵa jáne kásibılikke negizdelgen bilim ekonomıkasynyń irgetasy qalanady. Ósimdi yntalandyrý maqsatynda qarjy salasynda jáne «jedel damýshy qalalar» formatynda arnaıy quqyqtyq rejımderdi engizý múmkindigi qarastyrylyp jatyr. Mundaı rejımder memlekettik basqarý men sot júıesi qyzmetiniń erekshelikterin qamtýy múmkin, alaıda tek konstıtýtsııalyq zańdar aıasynda ǵana júzege asyrylady, — dep atap ótti Serik Jumanǵarın.
Mundaı jańashyldyqtar ınvestıtsııalar tartýǵa, retteýdiń jańa tásilderin synaqtan ótkizýge jáne ekonomıkalyq ósim núktelerin qalyptastyrýǵa múmkindik beredi.
Sonymen qatar, quqyqtyq boljamdylyqqa, memlekettik qadaǵalaýǵa, negizsiz sheshimderdiń bolmaýyna, birtutas qurylymnyń saqtalýyna kepildik beredi.
Atalǵan model halyqaralyq qarjy ortalyqtary men ınnovatsııalyq aımaqtardy damytýda óziniń tıimdiligin dáleldep úlgerdi.
— Jańa Konstıtýtsııa jobasynda menshik nysandarynyń barlyǵy teń dárejede qorǵalatynyn atap ótken jón. Bul ınvestorlar, kásipkerler, shaǵyn jáne orta bıznes úshin asa mańyzdy. Menshik quqyǵy qorǵalady, alaıda ony paıdalaný ekologııalyq standarttar men ózge tulǵalardyń quqyqtaryn eskerýi tıis. Bul jaýapty naryqtyń zamanaýı úlgisin qalyptastyrady, — dep jalǵastyrdy Premer-mınıstrdiń orynbasary.
Ulttyq valıýtamyz — teńge eń joǵary deńgeıde bekitilip otyr. Bul eldiń qarjylyq egemendigin nyǵaıtady.
Jańa Konstıtýtsııa jobasynyń ekonomıkalyq bólimi uzaq merzimdi damýǵa baǵyttalǵan, ashyq ári boljamdy turaqty quqyqtyq ortany qalyptastyrady.
Sóziniń sońynda Serik Jumanǵarın jobany jalpyulttyq referendýmǵa shyǵarý azamattarǵa degen senimniń kórinisi ekenin jáne halyq bıligi qaǵıdatyn rastaıtynyn atap ótti. Ol kezdesýge qatysýshylardy Konstıtýtsııa jobasymen muqııat tanysyp, referendýmǵa qatysý arqyly sanaly sheshim qabyldaýǵa shaqyrdy.
Salyq kodeksin engizý jónindegi jobalyq ofıs jáne bıznesti qoldaý
Vıtse-premer Salyq kodeksin engizý boıynsha jobalyq keńseniń jumysy týraly málimet berdi. Onyń alańynda apta saıyn bıznestiń ótinishteri qaralyp, quqyq qoldaný tájirıbesin túzetý boıynsha túsindirmeler men usynystar ázirlenedi.
Sonymen qatar, «Báıterek» ınvestıtsııalyq holdıngi arqyly qoldaý quraldary tanystyryldy. Olardyń maqsaty — suranysqa ıe taýarlar óndirisin arttyrý, ımportqa táýeldilikti tómendetý jáne ishki óńdeýdi tereńdetý.
Kezdesý barysynda kásipkerler birqatar naqty suraq qoıdy. Jelaev nan ónimderi kombınatynyń basshysy Almagúl Hamıtova makaron ónimderin óndirý kólemin keńeıtý úshin 2,5% jeńildikpen nesıe alý múmkindigi týraly surady. Atalǵan mólsherleme Soltústik Qazaqstan oblysynyń sút ónimderi fermalaryn salý tájirıbesin taratý baǵdarlamasy aıasynda, sondaı-aq sýarmaly jerlerdi damytý, kókónis jáne jemis saqtaý qoımalaryn salý, balyq sharýashylyǵyn damytý jáne aýyl sharýashylyǵynda ımportqa táýeldiligi joǵary basqa jobalardy júzege asyrý kezinde qoldanylady.
Al, bul rette Qazaqstannyń un óńdeý salasy damyǵan: elde jyldyq jalpy qýaty 9,3 mln tonna un shyǵaratyn 254 kásiporyn jumys isteıdi. Un óndirisi ishki tutynýdan shamamen 2,1 ese asyp túsedi, al makaron ónimderi óndirisi ishki naryq qajettiligin tolyq qamtamasyz etedi. Eksporttyq áleýetin jáne ónimniń keń assortımentin (20 túrli makaron ónimderi) eskere otyryp, Serik Jumanǵarın kombınatqa bıyl Kabýlda ótetin Qazaqstan–Aýǵanstan bıznes-forýmyna jáne otandyq ónimder kórmesine qatysýǵa usynys jasady. «Báıterek» holdıngine «Investıtsııaǵa tapsyrys» baǵdarlamasy aıasynda jobanyń qarjylyq modelin qarastyrý tapsyryldy.
«Stroıkombınat» JShS ókili Nurlan Nurbaev kásiporynnyń óz aldyna nemese kelisimshart boıynsha tótenshe-qutqarý qyzmetiniń mindetti bolýynyń oryndylyǵy týraly máseleni kóterdi. Bul norma 2014 jyldan bastap kúshine engen jáne qyzmet salasyna qaramastan iri óndiristik kásiporyndarǵa qatysty qoldanylady. Kásipkerdiń aıtýynsha, kásiporynnyń qyzmeti joǵary táýekel nysandarǵa jatpaıdy, biraq tótenshe-qutqarý qyzmetin qamtamasyz etý nemese mamandandyrylǵan uıymnyń qyzmetine aqy tóleý aıtarlyqtaı shyǵyndardy talap etedi.
«ORALMEZ» kompanııasy qýattylyǵy táýligine 500 tonna kúnbaǵys maıyn óndiretin zaýyt qurylysynyń jobasyn tanystyryp, jeńildetilgen qarjylandyrý múmkindikteri týraly surady. Agrarlyq nesıe korporatsııasynyń bas dırektory jobanyń eksportqa baǵdarlanýy jaǵdaıynda jeńildetilgen valıýtalyq nesıe alý múmkindigi baryn aıtyp, bul jaǵdaıda basqa mólsherleme qoldanylatynyn habarlady.
Sondaı-aq, kásipkerler jańa QQS-tyń jańa mólsherlemesi jaǵdaıynda kelisimsharttardyń oryndalýy men ónimdi qabyldaýǵa, arnaıy salyq rejımderin qoldanatyn jetkizýshiler men iri kásiporyndardyń jumysyna, sondaı-aq nesıelerdi qaıta qarjylandyrý múmkindigine qatysty máselelerdi kóterdi.
Jumys sapary óńirdegi óndiristik kásiporyndarǵa barýmen jalǵasty.
Budan buryn Jumanǵarın jalpy ishki ónimdegi taý-ken óndirý sektorynyń úlesi qysqaryp kele jatqanyn aıtqan edi.