Vıtse-premer Alakólge barady: Prezıdenttiń synynan keıin Úkimet otyrysy ótti

ASTANA. KAZINFORM – Premer-mınıstr Oljas Bektenov Prezıdent Qasym-Jomart Toqaevtyń týrıstik saladaǵy tapsyrmalarynyń oryndalý barysy týraly jıyn ótkizdi. Bul týraly Úkimettiń baspasóz qyzmeti habarlady. 

Onda Premer-mınıstrdiń orynbasary Ermek Kósherbaevtyń, Týrızm jáne sport mınıstri Erbol Myrzabosynovtyń Alakól kóliniń jaǵalaýyndaǵy ahýal týraly, sondaı-aq týrıstik ınfraqurylym, servıs jáne qaýipsizdik máselelerin qosa alǵanda, elimizdiń týrıstik aımaqtarynda jazǵy demalys pen qolaıly jaǵdaılardy uıymdastyrý jónindegi baıandamalary tyńdaldy. 

Premer-mınıstr óńir ákimderi men mınıstrlerge bul baǵyttaǵy jumysty kúsheıtýdi tapsyrdy. Birqatar tapsyrma berildi.

Memleket basshysy bergen eskertýlerdi jedel joıý úshin jergilikti jerlerde jumystardy úılestirý maqsatynda Premer-mınıstrdiń orynbasary Ermek Kósherbaev pen Týrızm jáne sport mınıstri Erbol Myrzabosynov óńirlerge jiberiledi. Onyń qorytyndysy boıynsha kináli laýazymdy tulǵalardy jaýapkershilikke tartý týraly usynys berilmek. 

Sonymen qatar jıyn barysynda Almaty taý klasterin damytý máseleleri qaraldy. Bul joba asa mańyzdy ınvestıtsııalyq bastamalar tizimine kiredi. Bastapqy kezeńde ınfraqurylymdyq jumystar josparlanǵan. Olardyń ishinde elektrmen, gazben jabdyqtaý, káriz jelileri men avtojoldar salý, sondaı-aq irgeles aýmaqtardy abattandyrý jáne odan ári jalpy álemdik deńgeıdegi kýrortty qalyptastyrý úshin jaǵdaılar jasaý jáne taǵy da basqa jumystar bar. Joba sonymen qatar jazǵy ınfraqurylymdy damytýdy, ornyqty damý qaǵıdattaryn engizýdi, qorshaǵan ortanyń tsıfrlyq monıtorıngin jáne nysandardyń ınklıýzıvtiligin qamtamasyz etýdi kózdeıdi.

Eske sala keteıik, buǵan deıin Prezıdent Úkimetke eldegi barlyq týrıstik baǵyttyń jaǵdaıyn retke keltirýdi tapsyrǵan bolatyn.