Vıtse-premer Alakól jaǵalaýynyń jerdi paıdalaný kartasymen tanysty
ASTANA. KAZINFORM – Memleket basshysynyń ishki týrızmniń sapasy men qaýipsizdigin arttyrý jónindegi tapsyrmalaryn júzege asyrý aıasynda QR Premer-mınıstriniń orynbasary Ermek Kósherbaev eldiń negizgi týrıstik baǵyttaryn qamtıtyn óńirlerde jumys saparyn jalǵastyryp jatyr.
Abaı oblysyna jasaǵan jumys sapary barysynda Ermek Kósherbaev Alakól kóliniń jaǵalaýyndaǵy týrıstik ınfraqurylymnyń jaı-kúıimen tanysty. Aıta ketý kerek, kól jaǵalaýy birneshe týrıstik aımaqtan turady: Abaı jáne Jetisý oblystaryndaǵy jaǵajaılar – árqaısysy óz ereksheligi, ınfraqurylymdyq júktemesi jáne damý baǵyty bar jeke lokatsııalar.
Abaı oblysyndaǵy kól jaǵalaýynda Premer-mınıstrdiń orynbasary demalýshylarmen, kásipkerlermen jáne medıtsına qyzmetkerlerimen kezdesip, abattandyrý nysandary men medıtsınalyq pýnktti qarap shyqty. Sanıtarlyq jaǵdaı, ruqsatsyz saýda, abattandyrý men qaýipsizdik máselelerine erekshe nazar aýdaryldy. Azamattar men týrısterdiń ótinishteri boıynsha birqatar tapsyrma berildi:
• tamaq ónimderiniń ruqsatsyz saýdasyna qatysty sanıtarlyq-epıdemıologııalyq qyzmettiń tekserisin uıymdastyrý;
• jaǵalaýdyń tazalyǵyna baqylaýdy kúsheıtý jáne qoqysty júıeli túrde shyǵarý;
• demalýshylar kóp jınalatyn jerlerge qosymsha qoqys jáshikteri men konteınerler ornatý;
• týrıstik aımaqty turaqty baılanyspen qamtamasyz etý máselesin qarastyrý.
Sonymen qatar Premer-mınıstrdiń orynbasary jaǵalaý boıyndaǵy jer paıdalaný kartasymen tanysyp, qoldanystaǵy bas josparǵa taldaý júrgizýdi tapsyrdy. Kásipkerlerdiń sý aıdynyna kirýge shekteý qoıylýy jeke másele retinde qaraldy. Jergilikti atqarýshy organdarǵa buzýshylyqtardy tez arada anyqtap, azamattardyń sýǵa erkin ótýin qamtamasyz etý tapsyryldy.
Abattandyrý jáne ınfraqurylymdy jańǵyrtý
Bıyl Alakól kóliniń jaǵalaýynda aýqymdy rekonstrýktsııalaý jáne abattandyrý jumystary bastaldy. Oblystyq bıýdjetten 658 mln teńge bólindi, onyń ishinde:
- 108,9 mln teńge – Arbat alańyn jóndeýge,
- 171,6 mln teńge jańa qoǵamdyq keńistik qurýǵa
- 107,5 mln teńge jaǵalaýdy abattandyrýǵa.
Jaǵajaıda 25 kıim aýystyrý kabınasy, 50 qoqys konteıneri, 2 bıodárethana, 10 sanıtarlyq torap (maýsym sońyna deıin 18-ge deıin jetkiziledi) ornatyldy. 7 pırstiń 3-eýi salyndy, jaryqtandyrý júrgizilip, qutqarý munaralary ornalastyryldy. Qosymsha 300 mln teńge bólindi:
•141,6 mln teńge – Kabanbaı aýylynda órt sóndirý deposynyń qurylysyna;
•57,7 mln teńge – kól jaǵalaýynda qutqarý stantsııasy qurylysyna;
•100 mln teńge – týrıstik aýmaqty damytýdyń bas josparyn ázirleýge.
El boıynsha júıeli tásil
Ermek Kósherbaev týrıstik aımaqtardy jaqsartý jumysy eldiń barlyq óńirlerin qamtıtyn memlekettik strategııa aıasynda júzege asyrylýy qajettigin atap ótti:
– Basty mindet – ýaqytsha sheshimder qabyldamaı, taza jaǵajaılar, qaýipsiz demalys, turaqty baılanys jáne oılastyrylǵan ınfraqurylymdy qamtıtyn ornyqty júıe qalyptastyrý. Týrızm – azamattar úshin jaıly, al óńirler úshin órkenıetti ekonomıkalyq áser ákelýi tıis, - dedi ol.
Barlyq óńirde anyqtalǵan másele ortaq: qoqys jáshikteriniń jetispeýi, beıbereket saýda, baılanystyń nasharlyǵy, zańsyz qurylystar. Osyǵan baılanysty óńirlerge jasaǵan sapar qorytyndysy boıynsha týrıstik aımaqtardy josparlaýdyń standarttaryn ózgertý jáne ákimdikter men qadaǵalaý organdarymen ózara is-qımyldy kúsheıtý syndy júıeli sharalar qabyldanady. Baqylaý Úkimet deńgeıinde júzege asyrylady.
Buǵan deıin Ermek Kósherbaevtyń Alakól kóliniń jaǵalaýyndaǵy demalys aımaqtaryn teksergenin jazǵan bolatynbyz.