Vıtse-mınıstr Úkimetke túsken shaǵymdar týraly: Dári-dármektiń ótkir tapshylyǵy joq

ASTANA. KAZINFORM — Premer-mınıstr Oljas Bektenov Úkimet otyrysynda ózine elde keıbir dárilerdiń tapshylyǵy týraly aqparat jetkenin aıtyp, Densaýlyq saqtaý mınıstriniń orynbasary Tımýr Muratovtan sonyń ras-ótirigin surady. 

— Dári-dármektiń keıbir túrinde tapshylyq bar ekeni týraly aqparat túsip jatyr. Bul ras pa, qandaı shara qabyldap jatyrsyzdar, — dep surady Premer-mınıstr.

Vıtse mınıstr jekelegen dárilerdiń tapshylyǵy týraly shaǵym mınıstrlikke jyl boıy túsip jatatynyn aıtty.

— Jyl boıy bizdiń mınıstrlikke keıbir ómirge mańyzy bar dári-dármektiń jetpeı jatqany týraly aryz-ótinishter kelip túsip jatady. Mınıstrlik soǵan baılanysty mynandaı júıelik sharalardy qabyldap jatyr. Áýeli biz biz «SQ-Farmatsııa» janynan kólemi 21 mlrd teńgege jetetin turaqtandyrý qoryn ashyp, sol jerde ómirge qajetti jáne áleýmettik mańyzy bar dárilerdiń rezervin saqtaýǵa múmkindik aldyq. Bıyl satyp alýlardyń erejesin jetildirý nátıjesinde 70 mlrd teńge únemdelgen. Sol aqshany qajetti dárilerdi satyp alýǵa jumsadyq. Oǵan qosa óńirlerde dárihana júıesin keńeıtýdi kózdep otyrmyz. «Aýyldaǵy densaýlyq saqtaý júıesin jańǵyrtý» ulttyq jobasy boıynsha salynǵan medıtsınalyq uıymdardyń bárinde dárihana beketterin ashý josparlanǵan, — dedi Tımýr Muratov.

Oljas Bektenov dál qazir elde dári tapshylyǵy bar-joǵyn qaıta naqtylady.

— Dál qazir óte ótkir tapshylyq joq, — dep qysqa qaıyrdy vıtse-mınıstr.

Aıta keteıik, búgin Úkimet halyqty dári-dármekpen qamtamasyz etý jaıyn talqylap jatyr.