Vıtse-mınıstr: Sýarmaly alqaptarda sý únemdeý talaptary oryndalmaı jatqan óńirler bar

ASTANA. KAZINFORM — QR Sý resýrstary jáne ırrıgatsııa birinshi vıtse-mınıstri Nurlan Aldamjarov QR Prezıdenti janyndaǵy Ortalyq kommýnıkatsııalar qyzmetinde ótken baspasóz konferentsııasynda elimizdegi agrarshylardyń sý únemdeý tehnologııalaryn qoldaný máselesine toqtaldy.

Spıkerdiń aıtýynsha, agrarlyq sektorda sý tapshylyǵyna baılanysty az sý tutynatyn daqyldarǵa kóshý mindeti qoıylǵanymen, bul talap barlyq óńirde tolyq saqtalyp otyrǵan joq.

— Bıyl biz jańa Sý kodeksin qabyldadyq. Bul qujatta klımattyń ózgerýi men sý resýrstarynyń azaıýyna baılanysty sý únemdeýshi tehnologııalardy engizý — mindetti talap retinde kórsetilgen. Bul normanyń oryndalýy biz úshin basym baǵyt, — dedi Nurlan Aldamjarov.

Sondaı-aq ol sózinde aýyl sharýashylyǵy salasynda sýdy kóp qajet etetin daqyldardy azaıtý máselesi boıynsha QR Aýyl sharýashylyǵy mınıstrligimen birlesken jumys júrip jatqanyn atap ótti.

— Biraq, bıyl keıbir óńir bizdiń eskertýler men usynymdarǵa qaramastan, sý resýrstary azaıyp jatqanyn bile tura, sý kóp qajet etetin daqyldardy kóbirek egip jiberdi. Bul týraly biz áleýmettik jelilerde de aıttyq. Mundaı jaǵdaı birinshi kezekte transshekaralyq ózenderge táýeldi aımaqtarda baıqaldy, — dedi vıtse-mınıstr.

Osyǵan baılanysty qazan aıynan bastap atalǵan baǵytta aýqymdy aqparattyq-túsindirý jumystary júrgizilmek.

— Biz qazirdiń ózinde Aýyl sharýashylyǵy mınıstrligimen birge, qazan aıynan bastap keń aýqymdy túsindirý jumysyn júrgizýdi josparlap otyrmyz. Alqaptarda sýarmaly sýdy kóp talap etetin daqyldar azaıtylýy tıis. Ásirese bul — sý tapshylyǵy bar óńirler úshin asa mańyzdy, — dep túıindedi ol.

Nurlan Aldamjarovtyń aıtýynsha, bul baǵyttaǵy baqylaý men jaýapkershilik kúsheıtiledi. Sý únemdeý tehnologııalaryn engizý — tek usynys emes, mindetti norma.

Buǵan deıin Sý salasy mamandary sýarmaly sýdy ádil bólý úshin túngi kezekshilikke shyǵa bastaǵanyn jazǵanbyz.