Vıtse-mınıstr Ordabaev: Qazaqstandyqtar 85 myń teńgege kúneltýi kerek degen joqpyn
Eńbek jáne halyqty áleýmettik qorǵaý vıtse-mınıstri Oljas Ordabaev 85 myń teńgege ómir súrýge bolatyny týraly atyshýly málimdemesine túsinikteme berdi, dep habarlaıdy QazAqparat tilshisi.
«Men qazaqstandyqtar 85 myń teńgege ómir súrýi kerek dep aıtqan joqpyn. Joq, árıne. Bul – memleket bekitetin, jumys berýshiler odan az tóleı almaıtyn, eń tómengi kepil berilgen deńgeı. Qazir eńbek naryǵynda budan joǵary aılyqtar bar ekeni túsinikti. Onyń mólsheri jumysshynyń biliktiligine, bilimine, qabiletine baılanysty», – dedi vıtse-mınıstr búgin Astanada Eńbek kúnine arnalǵan forým aldynda.
BAQ ókilderi tájirıbesi joq jastarǵa 85 myń teńgege qalaı kúneltýge bolatynyn surady.
«Al jas qyzmetshiler týraly aıtsaq, Eńbek jáne halyqty áleýmettik qorǵaý mınıstrligi jumyspen qamtýdyń túrli sharalaryn belsendi usynyp otyr. Memleket tarapynan jastarǵa arnalǵan sýbsıdııa bar, «Alǵashqy jumys orny» deıtin jastar tájirıbesi bar. Bul joba boıynsha eńbekaqynyń bir bóligin memleket 103 myń teńge kóleminde sýbsıdııalaıdy. Qalǵanyn jumys berýshi tóleýi kerek», – dedi Oljas Ordabaev.
