Vıtse-mınıstr: Olımpıadalyq emes sport federatsııalary jumysyn jalǵastyrady
ASTANA. KAZINFORM – «Dene shynyqtyrý jáne sport týraly» zań aıasynda memlekettik qarjylandyrý tek basym sport túrlerine baǵyttalady. Bul tizimge Olımpıada, Paralımpıada, Sýrdlımpıada oıyndary men ulttyq sport túrleri ǵana engizilgen.
Bul týraly Ortalyq kommýnıkatsııalar qyzmetinde ótken baspasóz máslıhatynda QR Týrızm jáne sport vıtse-mınıstri Serik Jarasbaev málimdedi.
Jıyn barysynda jýrnalıster sporttyq akrobatıka sııaqty olımpıadalyq emes, biraq balalardyń bastapqy sporttyq daıyndyǵynda mańyzdy ról atqaratyn sport túrleriniń bolashaǵy jaıly suraq qoıdy.
– Akrobatıka elimizde tarıhı túrde damyǵan jáne birqatar óńirde naqty jetistikterge jetken sport túri. Alaıda zań boıynsha 46 basym sport túri ǵana bıýdjet esebinen qarjylandyrylady. Bul – halyqaralyq jarys kúntizbesine engen jáne olımpıadalyq mártebesi bar sport túrleri, - dedi vıtse-mınıstr.
Onyń aıtýynsha, olımpıadalyq emes sport túrleri tolyq jabylmaıdy, olar buqaralyq sport retinde saqtalady. Federatsııalar óz jumysyn jalǵastyra beredi. Ondaı sport túrlerinde de sporttyq ataqtar beriledi, Qazaqstan chempıonattaryna qatysý múmkindigi saqtalady, tıisti normatıvter men talaptar oryndalady.
– Biz bul máseleni jan-jaqty talqyladyq. Óńirlerde 2023-2024 jyldary júrgizilgen monıtorıng nátıjesinde bıýdjet qarajatynyń 70 paıyzdan astamy olımpıadalyq emes sport túrlerine jumsalǵany anyqtaldy. Bul jaǵdaı elimizdiń Olımpıada oıyndaryndaǵy nátıjesine tikeleı áser etti. Sondyqtan Prezıdent pen Úkimettiń tapsyrmasyna sáıkes, zań aıasynda naqty shekteýler engizildi, - dedi Serik Jarasbaev.
Jıyn barysynda jýrnalıster bul ózgeristerdiń praktıkalyq iske asý jolyn surady. Mınıstrlik ókili vertıkaldy basqarý júıesi engiziletinin atap ótti.
– Mınıstrlik usynǵan model boıynsha sporttyq júıe pıramıda tárizdi qurylymmen damıdy. Onyń negizinde – buqaralyq sport (osy sanatqa engen akrobatıka da bar), odan joǵary deńgeıde – balalar men jasóspirimder sport mektepteri, sport ınternattary, olımpıadalyq daıarlaý ortalyqtary, joǵary sport sheberligi mektepteri, al eń joǵarǵy deńgeıde sportty damytý dırektsııasy ornalasady. Osy qurylymnyń barlyǵynda tek 46 basym sport túri ǵana júıeli túrde damytylady. Qalǵan sport túrleri buqaralyq deńgeıde qalsa, olardyń qarjylandyrýy edáýir az bolady, - dedi vıtse-mınıstr.
Buǵan deıin, Qazaqstan sportynda basym baǵyttary belgili bolǵanyn jazǵanbyz.