Vıtse-mınıstr: Medıtsına mamandarynyń basym bóligi 400 myń teńge jalaqy alyp júr
ASTANA. KAZINFORM — Densaýlyq saqtaý mınıstriniń orynbasary Tımýr Muratov Úkimet otyrysynan keıin ótken baspasóz máslıhatynda aılyǵy az dárigerlerge qosymsha tabys tabý múmkindigi qarastyrylǵanyn aıtty.
— Astanadaǵy iri medıtsınalyq uıymda patologoanatom bolyp jumys isteıtin áıel maman áleýmettik jelige óz tabysy týraly jazba shyǵardy. Qazan aıyndaǵy jalaqysy 6 kúndik aqysyz demalyspen qosqanda 120 myń teńge bolǵan. Bul medıtsına mamany úshin qalypty jalaqy dep esepteısiz be, — dep surady jýrnalıst.
Tımýr Muratov eldiń ekonomıkalyq ahýaly dárigerlerge qazirgiden artyq aqsha tóleýge múmkindik bermeıtinin aıtty.
— Shynymdy aıtsam, az. Biz dárigerler az tóleımiz. Dárigerlik nemese klınıkalyq medıtsına álemde eń joǵary aılyq tólenetin mamandyqtyń biri bolyp esepteledi. Biraq eldegi jaǵdaıdy, ekonomıkadaǵy jaǵdaıdy túsiný kerek. Ókinishke qaraı, dárigerlerge qazirgiden artyq tóleı almaımyz. Aýrýhanalar men emhanalardyń kóbi sharýashylyq júrgizý quqyǵy bar mekeme mártebesin ıelengen. Sol arqyly dárigerlerge tegin kepildendirilgen medıtsınalyq qyzmet túrine kirmeıtin, mindetti medıtsınalyq saqtandyrý qory tótep bermeıtin basqa servıstik qyzmet kórsetý arqyly qosymsha tabys tabýǵa múmkindik beremiz. Mundaı qyzmetten túsken aqshany aýrýhanalar ózine qaldyra almaıdy, — dedi ol.
Vıtse-mınıstr Ońtústik Koreıa sııaqty medıtsınalyq-áleýmettik salymdardyń kólemi joǵary elderde dáriger aılyǵy da joǵary ekenin eske saldy.
— Jalpy densaýlyq saqtaý júıesinde medıanalyq aılyq mólsheri 400 myń teńgeniń aınalasynda. Siz aıtyp otyrǵan patologoanatom doktor bolsa, ondaı doktorlardyń aılyǵy da osy mańaıda bolý kerek, — dedi Tımýr Muratov.
Al «SK-Farmatsııa» JShS basqarma tóraǵasy Nurlybek Asylbekov dárigerdiń jalaqyny qansha alatyny tikeleı basshysynyń iskerligine baılanysty degen pikir bildirdi.
— Óńirdegi densaýlyq saqtaý basqarmasyn basqaryp kórgen adam retinde aıtsam, mundaı jaǵdaılardy bilemin. Bizdegi aýrýhanalar men emhanalar negizinen sharýashylyq júrgizý quqyǵy bar uıymdar. Sondyqtan ondaǵy qyzmetkerlerdiń jalaqysy basshysyna, menedjmentine baılanysty. Men istegen kezde keıbir medbıkeler men dárigerlerimiz 1 mln teńgege deıin jalaqy alǵanyn bilemin. Saralanǵan eńbekaqy degen uǵym bar. Sondyqtan bul másele medıtsınalyq uıym basshysynyń deńgeıinde sheshilý kerek, — dedi «SQ-Farmatsııa» basshysy.
Aıta keteıik, búgin Úkimet halyqty dári-dármekpen qamtamasyz etý jaıyn talqylady.