Vıtse-mınıstr qolma-qol aqshasyz saýda jasaýdy ádetke aınaldyrǵan qazaqstandyqtarǵa keńes berdi
Qarjy vıtse-mınıstri Erjan Birjanov qolma-qol aqshasyz saýda jasaýdy ádetke aınaldyrǵan qazaqstandyqtarǵa keńes berdi, dep Kazinform.
«Mobıldi tólemdi QR-kod arqyly emes, aýdarym arqyly tólep úırenip qalǵan qazaqstandyqtarǵa qandaı keńes beresiz. Qyzmetti nemese taýardy kedergisiz alý úshin qaıtadan burynǵydaı qaltasyna qolma-qol aqsha salyp júrý kerek pe?» - dep surady jýrnalıst.
Vıtse-mınıstrdiń aıtýynsha, onlaın tólem jasaý tártibi ózgeredi eken dep qolma-qol aqsha salyp júrýdiń qajeti joq.
«Tutynýshy retinde aıtatyn bolsaq tutynýshylarǵa qaltańyzǵa qaǵaz aqsha salyp júrý kerek dep aıtpaımyn. Óıtkeni tutynýshy retinde talapty men qoıamyn ǵoı. Eger aqshasyz tólem jasaımyn desem, jeke kabınetimde kórsetemin. Mysaly, taksı júrgizýshi aýdarym arqyly tólem jasamaıtynymdy bilgendikten tasymaldaýdan bas tartsa, 2 mınýtta basqa aparýshy keledi. Ózińiz bilesiz, qazir bizde básekelestik damyp jatyr. Bul birinshiden.
Ekinshiden, eger taksı júrgizýshi tek qana qolma-qol aqsha nemese mobıldi aýdarym talap etip turyp alsa, onyń operatorynan da suraqtar týyndaýy múmkin. Olardyń belsendilik reıtıngteri bar degendeı. Sondyqtan zańdy túrde salyq tóleıtin adamdardyń qyzmetin tańdaýǵa keńes beretin edim.
Biz operatorlarmen memorandým jasap, kelisip jatyrmyz. «Agenttik» degen uǵym kirgizemiz. Mysaly, operatorlar taksıdiń qunyna tasymaldaýshydan alatyn salyq mólsherin qosyp eseptese, kólik ıesi salyqqa bas aýyrtpaıtyn bolady. Onyń salyq organdarymen eshqandaı baılanysy bolmaıdy. Osy tásil basqa da qyzmetterge, satýshylarǵa qoldanylýy múmkin. Bul qoldaý taýyp jatyr. Jańa Salyq kodeksinde osyndaı normalar bolady», - dedi Erjan Birjanov.
Vıtse-mınıstr bazardaǵy satýshylar qolma-qol aqsha nemese mobıldi aýdarym talap etse, zańdy túrde jumys isteıtin basqa satýshylardy taýyp alyp, qajetti taýardy solardan satyp alý múmkindigi bar ekenin eske saldy.
