Vıtse-mınıstr «Qaırat» - «Real Madrıd» oıyny aldynda jurt nege dúrlikkenin túsindirdi
ALMATY. KAZINFORM – Mádenıet jáne sport mınıstrligi 2025 jylǵy 30 qyrkúıekte Almatydaǵy Ortalyq stadıonda ótken «Qaırat» pen «Real Madrıd» arasyndaǵy Chempıondar lıgasy oıyny kezinde bolǵan jaǵdaıǵa qatysty túsinik berdi.
Mınıstrlik ókilderi men beıindi úkimettik emes uıymdar arasyndaǵy kezdesýde Qazaqstandaǵy sport ınfraqurylymy máselesi kóterildi. Mysal retinde keıbir jankúıerdiń «Qaırat» – «Real Madrıd» matchyna kire almaı qalǵany aıtyldy.
Vıtse-mınıstr Serik Jarasbaevtyń sózine qaraǵanda, match aldyndaǵy keleńsizdikterdiń óz sebebi bar. Alaıda bul máseleler aldaǵy ýaqytta tolyqqandy sheshiledi.
Jarasbaev «Real Madrıd» sııaqty álemdik deńgeıdegi klýbtyń Almatyǵa kelýi erekshe oqıǵa ekenin aıtty. Mundaı komandalar mıllıondaǵan aýdıtorııa jınaıdy, al qaladaǵy 20 myń oryndyq stadıon bul kólemge saı emes.
– Halyqaralyq deńgeıdegi matchtar ótkizý úshin ınfraqurylym da soǵan laıyq bolýy kerek. Memleket basshysynyń tapsyrmasymen elimizde 10 jańa stadıonnyń qurylysy bastaldy. Solardyń biri – Qyzylordadaǵy 12 myń kórermenge arnalǵan, ÝEFA-nyń 4-sanatyna saı arena. Al Almatyda ákimdik 35 myń oryndyq jańa stadıon salýǵa kirisedi. «Real Madrıd» taǵy kelse, endi olardy jańa úlken stadıonda qarsy alamyz, - dedi vıtse-mınıstr.
Vıtse-mınıstr sondaı-aq almatylyq fýtbolshylardyń nátıjesine joǵary baǵa berdi.
– Jalpy, bizdiń jigitter jarady. Chempıondar lıgasynyń negizgi kezeńine shyǵýdyń ózi – úlken jetistik. Bul – maqtanýǵa turarlyq nátıje, - dedi ol.
Munyń aldynda almatylyq «Qaırat» pen madrıdtik «Real» klýbtary arasyndaǵy oıynǵa bılet satyp alǵan 207 jankúıer kire almaı qalǵanyn jazǵanbyz. Osy jaǵdaıǵa baılanysty qalalyq polıtsııa tekserýdi bastady.
Eske salaıyq, 30 qyrkúıekte Almatyda Chempıondar lıgasynyń ekinshi týry aıasynda «Qaırat» pen madrıdtik «Real» komandalary oınaǵan edi. Oıynnan keıin áleýmettik jelilerde matchtyń uıymdastyrylýyna qatysty pikir kóbeıdi. Ondaǵan jankúıer qolynda bıleti bola tura, stadıonǵa kire almaǵanyn aıtyp, shaǵymdanǵan.
Іshki ister mınıstriniń orynbasary Sanjar Ádilov te jaǵdaıǵa pikir bildirdi. Onyń aıtýynsha, «Qaırat» — «Real Madrıd» matchynyń bıletterin zańsyz qaıta satý faktileri boıynsha barlyq shaǵym muqııat tekseriledi jáne ár derek boıynsha qajetti sharalar qabyldanady.
«Real» klýby Almatyda ótken UEFA Chempıondar lıgasy jalpy kezeńiniń ekinshi týry aıasyndaǵy kezdesýde «Qaıratty» 5:0 esebimen jeńdi.