Vıtse-mınıstr fýtbolǵa bólinetin aqshanyń stadıondarǵa baǵyttalmaıtyny týraly synǵa jaýap berdi
ASTANA. KAZINFORM – Týrızm jáne sport vıtse-mınıstri Serik Jarasbaev Májilis depýtatynyń fýtbolǵa bólinetin aqshanyń stadıondarǵa baǵyttalmaıtyny týraly synya jaýap berdi.
«Legıonerler boıynsha depýttarmen birge jumys júrip jatyr. Qazir Májiliste sport salasyndaǵy zańnama túzetýler men tolyqtyrýlar engizýdi kózdeıtin zań jobasy jatyr. Sonda legıonerlerge qatysty naqty normalar bar. Qazir sol normalardy talqylap jatyrmyz. Zań jobasy maquldanǵan kezde sport salasyndaǵy legıonerlerdiń qyzmetin, qarjylandyrý máselesin retteımiz», - dedi ol vedomstvonyń alqa májilisinen keıin.
Mınıstr stadıondardyń máselesin ár oblys óz álinshe sheship jatqanyn aıtty.
«Úlken stadıondar týraly aıtsaq, ár óńir aldyna standartqa saı stadıondar týraly maqsat qoıǵan. Túrkistanda stadıon salynyp bitti. Kóshpendiler oıynynan keıin «Astana Arenada» qaıta jaraqtandyrý júredi. Biz ákimdikpen birge osy stadıondy qaıta jaraqtaýǵa, UEFA qoıatyn standarttardyń bárine saı bolý úshin qarjy saldyq», - dedi Serik Jarasbaev.
Eske salaıyq, Májilis depýtaty Qazybek Isa Qazaqstan 30 jylda bir ǵana stadıon salsa, kórshiles Ózbekstan 10 stadıon salyp úlgergenin aıtyp, saýal joldaǵan edi.
«Qazaqstan 30 jylda bir ǵana stadıon salsa, bizden fýtbol bıýdjeti eki ese az Ózbekstan 10 stadıon salǵan. FIFA reıtıngisi boıynsha Qazaqstan 125-orynda, al TMD boıynsha fýtbol bıýdjeti eń az Qyrǵyzstan 96-orynda. Brazılııaǵa «alaqaılap» jibergen 78 balaqaıdyń bir de bireýi qazir fýtbol oınamaıdy. Esepsiz mıllıardtardy dalaǵa shashamyz, biraq gol joq. Al aýyldarda qarjy tapshylyǵynan jol joq», - degen edi Qazybek Isa.
