Vıtse-mınıstr eGov portaly nege «qulaǵanyn» túsindirdi

ASTANA. KAZINFORM — Búgin eGov portalynda birinshi synypqa qujat qabyldaý bastaldy. Alaıda qazaqstandyqtar tehnıkalyq aqaýlarǵa tap boldy.

Júıedegi aqaý sebebin QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Rostıslav Konıashkın túsindirdi.

Vıtse-mınıstr rasynda da, elektrondyq úkimet platformasynda qysqamerzimdi aqaýlar baıqalǵanyn, bul mektepke qabyldaý qyzmetin paıdalanýshylardyń tym kóp bolýymen baılanysty ekenin aıtty.

— Degenmen, az ýaqytta platforma qalpyna keltirildi. Qyzmetti iske qosý 15:00–ge josparlanǵan bolatyn, sáıkesinshe, 15:00–de portal qalypty jumysyna kirisedi. eGov — azamattardyń elektrondyq úkimetpen baılanysýyna arnalǵan tereze ispetti ǵana júıe. Onyń artynda barlyq memlekettik organdardyń aqparattyq júıelerimen biriktirilgen 2000-nan astam ıntegratsııalyq servıs bar. Osy servısterdiń bireýi istemeı qalsa, onymen baılanysty barlyq qyzmetter de ýaqytsha qoljetimsiz bolady, — dedi R. Konıashkın Úkimette ótken brıfıngte.

Sonymen birge, spıker eGov — óte aýqymdy ekojúıe ekenin atap ótti.

— Búgin mınıstr Jaslan Mádıev jańa eGov 3.0 júıesin iske qosatynymyz týraly baıandama jasady. Bul — tolyq jańartylǵan, qaıta jasalǵan portal. Ótken jyldan beri biz keıbir komponentterdi iske qosa bastadyq, olardyń bir bóligi bıyl jańartylyp jatyr. Eki jylda barlyq servıster men komponentter jańartylady. Al bıyl jańartylǵan, yńǵaıly ári turaqty jumys isteıtin portaldyń jańa nusqasyn kóresizder, — dedi Rostıslav Konıashkın.

Buǵan deıin Jaslan Mádıev eGov portalyn jańǵyrtý jumystary qalaı júretinin aıtyp bergen edi.

Aıta keteıik, ótken jyly Qazaqstanda memlekettik qyzmettiń 91% onlaın kórsetilgen. «Ulttyq qor — balalarǵa», «Stop-kredıt», «Kólik ıelený tarıhy», «Qumar oıyndarǵa qatysýdan erikti túrde bas tartý» sekildi tanymal servıster iske qosylǵan.

Sondaı-aq, sáýirdiń sońyna deıin jeke kýálikti aýystyrý protsesi tolyǵymen onlaın formatqa kóshiriledi.