Vıtse-mınıstr bilim granttaryn satý jónindegi jarnamalarǵa pikir aıtty

ASTANA. KAZINFORM — QR Ǵylym jáne joǵary bilim vıtse-mınıstri Darhan Ahmed-Zakı vedomstvo bilim granttaryna qatysty zańsyz áreketterdi tekserýge daıyn ekenin aıtty.

Búgin Senattyń jalpy otyrysynan keıingi baspasóz máslıhatynda tilshiler ýnıversıtetter granttaryn satý jarnamalaryna qatysty suraq qoıdy. Bul turǵyda keıbir stýdentter óz shaǵymdaryn áleýmettik jelilerde jarııalaǵan. 

— Eger naqty faktiler bolsa, tekserýge daıynbyz. Ǵalamtor keńistiginde ártúrli jarnamalar bar, olardyń kópshiligi jalǵan bolýy múmkin jáne bul muqııat tekserýdi qajet etedi, — dedi D. Ahmed-Zakı.

Vıtse-mınıstr grant bólý júıesi qatań túrde Ulttyq biryńǵaı testileý (UBT) qorytyndysynan keıin júzege asyrylatynyn basa aıtty.

— Qazir synaq UBT-nyń birinshi kezeńi bastaldy, kelesisi kóktemde, al sońǵy kezeńi maýsym aıynda bolady. Alǵan upaılardyń qorytyndysy boıynsha granttardy bólý jónindegi komıssııanyń otyrysy tamyz aıynda ótedi, — dedi vıtse-mınıstr.

Budan buryn habarlanǵandaı, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine mádenıet, bilim berý jáne tálimgerlik máseleleri boıynsha ózgerister men tolyqtyrýlar engizý týraly» Zańy maquldandy. 

Zań aıasynda Halyqaralyq ǵylymı jobalar men olımpıadalardyń jeńimpazdaryna joǵary oqý oryndaryna granttar berý jáne «Bolashaq» baǵdarlamasy aıasynda bakalavrıatqa túsý múmkindigi engiziledi.