Vıtse-mınıstr: Aýyldyq bıýdjetterdiń ózin-ózi qamtamasyz etý múmkindigin arttyrý qajet
ASTANA. KAZINFORM — Májiliste jergilikti ózin-ózi basqarý máseleleri men aýdan, aýyl ákimderiniń jumys tájirıbesin talqylaý boıynsha Qoǵamdyq palatanyń otyrysy ótti, dep habarlaıdy Ekonomıka mınıstrliginiń baspasóz qyzmeti.
Ulttyq ekonomıka vıtse-mınıstri Baýyrjan Omarbekovtyń aıtýynsha, jergilikti ózin-ózi basqarýdy damytý jónindegi sharalar 2021 jyly qabyldanǵan Jergilikti ózin-ózi basqarýdy damytýdyń 2025 jylǵa deıingi tujyrymdamasy aıasynda iske asyrylýda.
«Ótken jyldyń basty reformalarynyń biri 42 aýdan men oblystyq mańyzy bar 3 qala ákimderiniń pılottyq saılaýy boldy. Aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń ákimderin saılaý jalǵasýda. Barlyǵy aýyl ákimderiniń 93 paıyzy (2176 aýyl ákimi) saılandy. Áli de 169 aýyl ákimi saılanady. 2025 jyldan bastap barlyq aýdandar men oblystyq mańyzy bar qalalardyń ákimderi ǵana saılanatyn bolady», — dep atap ótti vıtse-mınıstr.
B. Omarbekovtyń aıtýynsha, eń ózekti másele — aýyl bıýdjetiniń kiris kózderin keńeıtý. Bıýdjettiń IV deńgeıi engizilgen sátten bastap (2018 jyl) túsimder dınamıkasy 2 esege ulǵaıdy. 2023 jyldyń qorytyndysy boıynsha IV deńgeıdegi bıýdjetke jospar boıynsha 308 mlrd teńge is júzinde 320 mlrd teńge tústi. Ózin-ózi qamtamasyz etý úlesi 21,2% qurady.
«Biraq bul aýyldardy damytý úshin jetkiliksiz. Aýyldyq bıýdjetterdiń ózin-ózi qamtamasyz etý múmkindigin arttyrý qajet. Aýyldyq bıýdjetterdiń kiris kózderin keńeıtý jumystary jalǵasady. IV deńgeıdegi menshikti kiris 4 esege artady dep kútilýde», — dep qosty UEM basshysynyń orynbasary.
Buǵan qosa, aýyl ákimderiniń bıýdjetin qalyptastyrý men jumsaý tetigin qaıta qaraý qajettiligi bar. 2018 jyldan bastap IV deńgeıde jumys isteıtin bıýdjettik protsester jetildirýdi talap etedi. Aýyldyq okrýgterge bıýdjetti bólýdiń jańa tetigi qarastyrylýda, onda bıýdjettik baǵdarlamalardy 17-den 4-ke deıin ulǵaıtý kózdelgen.
Eske salsaq, buǵan deıin Májilis depýtaty Anas Baqqojaev aýyl ákimderiniń bedelin, quzyretin kóterý máselesin kótergenin habarlaǵanbyz.
