Vıtse-mınıstr Turysovtyń jubaıy múlikti jalǵa berýden tapqan tabysyn jarııalady
ASTANA. KAZINFORM – Qarjy mınıstrliginiń saıtynda vedomstvodaǵy laýazymdy tulǵalardyń kiristeri týraly málimet jarııalandy.
Birden aıtý kerek, ózi men jubaıynyń tabysy men múligi týraly deklaratsııa málimetterin vıtse-mınıstr Áset Turysov qana jarııalaǵan. 2024 jyly onyń jubaıy Jibek Turysova 6 mln 800 myń teńge tabys tapqan.
Mınıstrliktiń baspasóz qyzmeti Kazinform tilshisine bul tabystyń múlikti jalǵa berýden túskenin aıtty.
Mınıstr Mádı Takıev pen vedomstvonyń ózge laýazymdy tulǵalary nege tabysy men múlki týraly málimet jarııalamaǵanyn vedomstvo bylaısha túsindirdi:
- Sybaılas jemqorlyqqa qarsy is-qımyl agenttigi tóraǵasynyń 2025 jylǵy 7 aqpandaǵy «Jarııalanatyn aqparat tizbesin bekitý týraly» №26 buıryǵyna sáıkes jeke tulǵanyń derbes salyq salýǵa jatatyn kiristeri týraly málimetter ǵana jarııalanady. Eger tizilimniń tarmaǵyna sáıkes kórsetiletin tabys bolmaǵan jaǵdaıda, atalmysh málimetterdi jarııalaý júrgizilmeıdi, - dep jazylǵan resmı jaýapta.
Basqasha aıtsaq, mınıstrliktiń ózge laýazymdy tulǵalary men jubaılary 2024 jyly deklaratsııaǵa ashyp kórsetetin kiris almaǵan.
Jalpy bul vedomstvoda 6 saıası laýazymdaǵy tulǵa jumys isteıdi. Buǵan deıin Qarjy mınıstri Mádı Takıev memlekettik qyzmetshilerdiń deklaratsııasy nelikten áli jarııalanbaı jatqanyn túsindirgen edi.