Vıtse-mınıstr: Adam ómirin saqtap qalýǵa jol ashatyn mańyzdy qadam
ASTANA. KAZINFORM — QR Densaýlyq saqtaý vıtse-mınıstri Tımýr Muratov Mańǵystaý oblysyndaǵy jumys istep turǵan jáne salynyp jatqan densaýlyq saqtaý nysandaryn aralady.
Alǵashqy baǵyt — Mańǵystaý oblystyq shuǵyl jáne jedel medıtsınalyq kómek stantsııasynyń qurylysy boldy. Búginde jańa ǵımarattyń qurylysy 65%-ǵa aıaqtalǵan. Jobanyń júzege asyrylýy óńir turǵyndaryna shuǵyl kómek kórsetýdiń zamanaýı bazasyn quryp, medıtsınalyq brıgadalardyń áreket etý jedeldigin arttyrýǵa múmkindik beredi.
Odan keıin vıtse-mınıstr oblystyq balalar aýrýhanasynyń ǵımaratyn qarap, onyń tehnıkalyq jaǵdaıymen tanysty. Ol mekemeni odan ári jańǵyrtý qajettigin atap ótip, balalarǵa arnalǵan medıtsınalyq ınfraqurylymnyń qazirgi zamanǵy qaýipsizdik, qolaılylyq jáne medıtsınalyq qyzmet kórsetý sapasy talaptaryna saı bolýy kerektigin erekshe atap ótti.
Sapar barysynda Tımýr Muratov Mańǵystaý oblystyq onkologııa ortalyǵynyń janynan ashylǵan pozıtrondyq-emıssııalyq tomografııa ortalyǵynda boldy. Bul — Batys óńirindegi alǵashqy, ári ázirge jalǵyz ortalyq.
Zamanaýı jabdyq onkologııalyq aýrýlardy erte kezeńde anyqtaýǵa jáne tıimdi emdeý tásilin qurýǵa múmkindik beredi. Vıtse-mınıstr alǵashqy patsıenttermen áńgimelesip, dıagnostıkalyq úderistiń uıymdastyrylýymen tanysty.
— Mańǵystaý oblysyndaǵy medıtsınalyq ınfraqurylymdy kúsheıtý — Úkimet pen Densaýlyq saqtaý mınıstrliginiń basty nazarynda. Pozıtrondyq-emıssııalyq tomografııa ortalyǵynyń iske qosylýy Batys óńiriniń turǵyndary úshin sapaly onkologııalyq dıagnostıkanyń qoljetimdi bolǵanyn bildiredi. Bul — adam ómirin saqtap qalýǵa jol ashatyn mańyzdy qadam, — dep atap ótti Tımýr Muratov.
Densaýlyq saqtaý uıymdarynyń basshylarymen ótken keńes barysynda vıtse-mınıstr medıtsınalyq kadrlardy tartý, nysandardy jańǵyrtý jáne qyzmet kórsetý sapasyn arttyrý boıynsha tapsyrmalar berdi.
Baǵdarlamanyń jeke tarmaǵy retinde Qosbulaq aýylynda «Aýyldaǵy densaýlyq saqtaýdy jańǵyrtý» ulttyq jobasynyń sheńberinde salynyp jatqan dárigerlik ambýlatorııanyń qurylysy qaraldy.
Tımýr Muratov nysan qurylysyn sapaly, ári ýaqytyly aıaqtaýdy, sondaı-aq ony lıtsenzııalaýǵa jáne paıdalanýǵa berýge daıyndyqty qamtamasyz etýdi tapsyrdy.
Eske salaıyq, Ulytaý oblysynyń Densaýlyq saqtaý júıesin damytýdyń keshendi jospary bekitildi.