«Vıtebskidegi slavıan bazary» festıvalinde qos úmitker laıyqty óner kórsetti - mádenıet qaıratkeri Qarlyǵash Ábdikárimova
LMATY. Shildeniń 22-si. QazAqparat /Názıra Eleýhan/ - Belarýs elinde ótken shyǵarmashylyq dodada Qazaqstannyń atynan qatysqan qos úmitker - HІH halyqaralyq «Vıtebskidegi slavıan bazary» óner festıvaliniń júldegerleri almatylyq Dınara Sultan men jeti jastaǵy qostanaılyq Aıarý Ormanova bedeldi halyqaralyq baıqaýda laıyqty óner kórsetti.
Bul týraly búgin Almatyda «Qazaqstandyqtar HІH halyqaralyq «Vıtebskidegi slavıan bazary» festıvalinen júldemen oraldy» degen taqyrypta ótken baspasóz máslıhatynda «Vıtebskidegi slavıan bazary» festıvaliniń Qazaqstandaǵy resmı ókili, mádenıet qaıratkeri Qarlyǵash Ábdikárimova aıtty, dep habarlaıdy QazAqparat.
Esterińizge sala ketsek, «Vıtebsk-2010» estradalyq án baıqaýy shildeniń 7-si men 16-sy aralyǵynda ótip, oǵan 34 eldiń, Armenııa, Belarýs eli, Bolgarııa, Bosnııa, Gertsegovına, Grýzııa, Qazaqstan, Kýba, Lıtva, Makedonııa, Moldova, Polsha, Reseı, Rýmynııa, Serbııa, Slovakııa, Ýkraına syndy elderdiń ónerpazdary qatysqan bolatyn. Festıvaldiń tusaý keseri men birinshi kúni ár ánshi óz memleketiniń ánderin oryndasa, ekinshi kúni baıqaý tártibi boıynsha qatysýshylar Býlarýs eliniń ulttyq kontsert orkestiriniń súıemeldeýimen slavıan tilinde án oryndap, saıysqa túsken bolatyn. Belarýs elinde Qazaqstan atynan qatysqan ánshi Dınara Sultan júldeli úshinshi oryndardy ıelenip qaıtsa, balalardyń án baıqaýyna qatysqan jeti jasar Aıarý Ormanova da laýreat atanyp, 3-shi oryndy qanjyǵasyna baılap qaıtty.
«Dınara Sultan elimizde ótken irikteýden ótip, 28 úmitkerden ozyp shyqqan bolatyn. Ol bul baıqaýda da asqan sheberlik tanytty. Oǵan slavıan tilinde oryndaý ońaıǵa soqqan joq, degenmen, ol synnan súrinbeı ótip, baıqaý laýreaty atandy. Laıyqty óner kórsetken Dınara bul ataqpen qosa, Belarýs jáne Reseı odaqtas memleketteriniń jeke dısk jazý úshin taǵaıyndalǵan arnaıy 250 000 rýbl syılyǵyna ıe boldy. Al, Halyqaralyq «Boztorǵaı-2009» balalar án baıqaýynyń gran-prı ıegeri, jeti jasar Aıarý óziniń tamasha daryn ıesi ekenin dáleldeı bildi. Bizdiń Aıarý qatysýshylardyń arasynda jasy jaǵynan eń kenjesi bolǵanyna qaramastan, júldeger atandy», dedi «Vıtebskidegi slavıan bazary» festıvaliniń Qazaqstandaǵy resmı ókili Q.Ábdikárimova.
Onyń aıtýynsha, on toǵyz jyldyq tarıhynda «Vıtebskidegi slavıan bazary» festıvali álemdegi mańyzdy oqıǵalar qataryna kirip úlgergen. ««Slavıan bazarynyń» qaıtalanbas bet-beınesi, adamdardy ózine baýrap alatyn ózindik dástúri bar. Vıtebsk festıvaliniń osynshalyqty tabysty da tartymdy bolýynyń sebebi osynda. Onda eshqashan kommertsııalyq múdde alǵashqy orynǵa qoıylmaıdy. Festıval án óneriniń qaı baǵytta ózgergenine qaramastan óner ıeleriniń erkindigin saqtap, olarǵa únemi qoldaý kórsetýdi kózdeıdi», dedi ol.
