Vıtebsk qalasyndaǵy jattyǵý kezinde qazaqstandyq sportshy kóz jumdy
ASTANA. QazAqparat - Tergeý komıtetiniń Vıtebskıı qalalyq bólimi kir tasyn kóterý trıatlony boıynsha ekinshi Dúnıejúzilik olımpıadaǵa qatysý úshin Belarýstiń Vıtebsk qalasyna kelgen Qazaqstan Respýblıkasynyń azamaty, 77 jastaǵy sportshynyń ólim qushý faktisi boıynsha tergeý aldy tekserýdi bastady dep habarlaıdy BELTA.
Vıtebsk oblysy boıynsha TK basqarmasynyń resmı ókili Inna Gorbachevanyń aıtýynsha, 14 tamyzda quqyq qorǵaý organdaryna 1937 jyly týylǵan, Qazaqstan komandasyndaǵy jarysqa qatysýshylardyń biri Vıtebsk ortalyq sport kesheniniń sport zalynda bir mınýt 10 kelilik kir tasyn kóterip bolǵan soń, qulap qalǵandyǵy jaıynda habarlama kelip tústi. Jedel medıtsınalyq kómek esh nátıje bermedi. Jedel járdem dárigerleri sportshynyń ólim qushqanyn jetkizdi.
Oqıǵa ornyna kelgen jedel tergeý toby oqıǵa ornyn qarap, kýágerlerden jaýap aldy. Basqa da qajetti tekserý sharalary júrgizildi. Aldyn ala boljam boıynsha, er adam jedel júrek jetispeýshiliginen qaza tapqan.
Qazanyń naqty sebebin anyqtaý úshin Belarýstiń Memlekettik sot saraptamasy komıtetiniń qyzmetkerlerine sot-medıtsınalyq saraptama júrgizý tapsyryldy.
