Vıtalıı Jýkovskıımen birge «Atyraý» fýtbol klýbyna kimder keri oraldy

ATYRAÝ. KAZINFORM – Búgin «Atyraý» fýtbol klýbynyń bas jattyqtyrýshysy qyzmetine kirisken Vıtalıı Jýkovskıı serikterin keri shaqyrdy. 

«Atyraý» fýtbol klýby baspasóz qyzmetiniń málimetine súıensek, bas jattyqtyrýshynyń burynǵy serikteri keri oralǵan. 

— Buǵan deıin bizdiń komandada eki jarym jyl qyzmet etken onyń seriktesteri Pavel Plıýt pen Andreı Mısıýk te «munaıshylar» sapyna qaıtyp keldi. Pavel Plıýt bas bapkerdiń kómekshisi, Andreı Mısıýk fızıkalyq daıyndyq jónindegi jattyqtyrýshy bolyp taǵaıyndaldy, — dep habarlady fýtbol klýbynyń baspasóz qyzmeti.

Sondaı-aq, Qýanysh Qabdolov endi «Atyraý» fýtbol klýbynyń jańa sport dırektory laýazymyn atqarady. 

— Jergilikti maman 2009-2012 jyldar aralyǵynda «Atyraýdyń» jastar komandasynda bas bapker kómekshisi bolyp eńbek etti. 2013 jyly «Atyraý» fýtbol ortalyǵynyń basshysy bolyp taǵaıyndaldy. Onyń bapkerligimen 1999 jyly týǵan jasóspirimder komandasy Qazaqstan birinshiligin jeńip aldy, — dep málim etti komandanyń baspasóz qyzmetinen. 

Ol 2014-2020 jyldary «Atyraý» fýtbol klýby bas bapkeriniń kómekshisi, bas jattyqtyrýshy mindetin atqarǵan. Sol kezeńde — 2017 jáne 2019 jyly jergilikti komanda eki márte Qazaqstan Kýboginiń fınalyna shyqqan.

— Keıin 2021-2022 jyldary «Turannyń» bas bapkerine kómektesip, sodan soń komanda tizginin ózi ustady. Al byltyrǵy maýsymda aqtaýlyq «Kaspııdiń» bas bapkeri retinde Birinshi lıganyń qola medalin jeńip aldy. «Atyraý» QJL komandalarynyń koordınatory boldy. Bıylǵy maýsymda «Atyraý» FK bas bapkeriniń mindetin ýaqytsha atqardy, — dep málimdedi baspasóz qyzmeti. 

Eske sala ketelik, buǵan deıin «Jeńispen» kezdesýden soń Denıs Mamonov «Atyraý» fýtbol klýbynyń bas jattyqtyrýshysy qyzmetinen ketti. 

Al keshe «Atyraý» fýtbol klýbynan bir mezgilde 8 oıynshy ketetinin habarlaǵan bolatynbyz. 
Búgin Vıtalıı Jýkovskıı qaıtadan «Atyraý» komandasynyń bas jattyqtyrýshysy bolǵanyn  jazǵan edik.