Vıtalıı Verevkın saqtandyrý ombýdsmeni bolyp qaıta saılandy
ALMATY. Jeltoqsannyń 8-i. QazAqparat /Erlik Erjanuly/ - Qazaqstanda TMD elderindegi alǵashqy saqtandyrý ombýdsmeni óz qyzmetine qaıta saılandy,
dep habarlaıdy QazAqparat.
"Qazaqstan Respýblıkasynyń 2003 jylǵy "Kólik ıeleriniń azamattyq-quqyqtyq jaýapkershiligin mindetti saqtandyrý týraly" Zańyna sáıkes, saqtandyrý ombýdsmeniniń ókilettik merzimi 2 jyl. Zań boıynsha qazirgi ombýdsmen Vıtalıı Verevkınniń ókilettigi qarashanyń 26-synda aıaqtaldy. Alaıda, qarashanyń 20-sy kúni ótken saılaýda ol óz qyzmetine qaıta saılandy.
"Keńes otyrysyna qatysqan 26 saqtandyrý kompanııasynyń 25-niń ókili V. Verevkındi qaıta saılaýdy qoldap daýys berdi. Saılaýǵa úmitker retinde qazirgi saqtandyrý ombýdsmeni V. Verevkın, "Alataý" SK" Basqarma múshesi E. Elýbaev, "Vıktorııa" SK" Basqarma tóraǵasynyń orynbasary V. Shapyrın, "Nurpolıs" SK" tóraǵasynyń orynbasary R. Asımov qatysqan bolatyn. Vıtalıı Verevkınniń kandıdatýrasyn saqtandyrýshylar tarapynan kelip túsken usynystarǵa sáıkes QR Qarjy naryǵy men qarjy uıymdaryn retteý jáne qadaǵalaý agenttigi usyndy. Oǵan usynysty kólik ıeleriniń jaýapkershiligin saqtandyrý lıtsenzııasy bar 29 saqtandyrý kompanııasynyń 23-i jasaǵan bolatyn", deıdi "Kommesk ómir" AQ-nyń Basqarma tóraǵasynyń orynbasary Vladımır Akentev. Onyń aıtýynsha, V. Verevkınniń qyzmetine Agenttiktiń de kóńili tolady. Vıtalıı Verevkın 2 jyldyń ishinde saqtandyrý ombýdsmeni ınstıtýtyn qura aldy. Sondaı-aq bıylǵy jyldyń qazan aıynan bastap daý-damaılardy onlaın tásilimen retteý júıesin óndiristik qoldanysqa engizdi.
