Vıtalıı Klıchkonyń Golovkınge aıtary bar
ASTANA. QazAqparat - Asa aýyr salmaqtaǵy álemge tanymal ýkraındyq boksshy Vıtalıı Klıchko qazaqstandyq boksshy Gennadıı Golovkın men meksıkalyq Saýl Alvarestiń jekpe-jegindegi tórelikke qatysty pikirimen bólisip, olardyń aldaǵy ýaqytta oryn alýy múmkin qarymta kezdesýine oraı bylǵary qolǵap sheberlerine keńes berdi, dep habarlaıdy QazAqparat.
«Golovkın-Alvarestiń jekpe-jegi tárizdi aıqasty Sizdiń árqashanda tolqynyspen kútetindigińiz shyndyq. Óıtkeni, olar óte qabiletti sportshylar. Biraq, nashar tórelik sheshimder boksta ár ýaqytta bolǵan. Ár ýaqytta da nátıjege kóńili bolmaı qalatyndar da bola beredi. Ókinishke oraı qazirgi ýaqytta mundaı sheshimder arta túsýde. Alaıda, egerde sen qarsylasyńdy nokaýtqa túsirseń, onda sende tóreshiler sheshimine qatysty eshqandaı problema bolmaıdy. Mundaı jaǵdaıda atalǵan problemadan shyǵýdyń qarapaıy joly osy», - dep keltiredi Vıtalıı Klıchkonyń pikirin Boxingscene.com saıty.
Sonymen qatar dańqty boksshy WBC prezıdenti Maýrısıo Sýleımannyń tóreshilerge arnaıy qulapqap berip, olardyń jumysyn jeńildetýge qatysty ıdeıasyna da qoldaý bildirgen. Óıtkeni, jekpe-jekti kórýge kelgen jankúıerlerdiń aıǵaı-shýy upaı sanyn esepteıtin tóreshilerge kedergi keltirýi yqımal.
«Azdaǵan tehnologııa engizý jónindegi Maýrısıo usynysyn qoldaımyn. Ol boks ómirine kúndelikti qatysyp júrgen adam jáne ne qajet ekendigin de biledi. Jekpe-jekte barynsha obektıvti bolý qajet. Eger engiziletin jańashyldyq tóreshilerdiń jumysyn jeńildeter bolsa, onda men eshqandaı problemany kórip otyrǵanym joq», - dedi ol.
Aıta keteıik, 17 qyrkúıekte WBA (Super), WBC, IBF men IBO tujyrymdary boıynsha álem chempıony Gennadıı Golovkın (37-0, 33 KO) kópten kútken jekpe-jegin ótkizdi. Ol AQSh-tyń Las-Vegas qalasynda uıymdastyrylǵan boks keshinde meksıkalyq bokstyń jaryq juldyzy - Saýl "Kanelo" Alvarespen (49-1-1, 34 KO) judyryqtasyp, teń tústi. Al Golovkın - Alvares revanshy 2018 jyldyń 5 mamyrynda ótedi dep boljanýda.
