Vıtalıı Klıchko óziniń bokstan ketetindigi týraly aqparatty joqqa shyǵardy
ASTANA. 25 qyrkúıek. QazAqparat - WBC nusqasy boıynsha bokstan álem chempıony Vıtalıı Klıchko óziniń sporttyq mansabyn áli aıaqtamaıtyndyǵyn málim etti.
Bul týraly Reseı Jańalyqtary agenttigi habarlady.
Buǵan deıin BAQ-tar asa aýyr salmaqtaǵy ýkraındyq boksshy jáne ÝDAR partııasynyń kóshbasshysy Donetskide ótken baspasóz máslıhatynda aıtqan «men endi bokstaspaımyn» degen sózderin taratqan bolatyn. Birshama ýaqyttan keıin Klıchkonyń baspasóz qyzmeti ol «men qartaıǵanǵa deıin bokstaspaımyn» dep aıtqandyǵyn naqtylap berdi. «Ázirshe meniń sporttaǵy mansabymnyń aıaqtalatyndyǵy týraly áńgime qozǵalmaıdy. Donetskide ótken baspasóz máslıhatynda buǵan jete ekpin bermegenim úshin keshirińizder. Ýkraına boıynsha saılaýaldy kezeńinde júrmin. Jáne Donetsk oblysyna naqty sporttyq mansabymmen qoshtasý úshin kelgenim joq», - dep málimdedi boksshy.
«Bul qashan bolady?» degen suraqtan azdap sharshadym. Mundaı sheshim qabyldaǵan kezde ol týraly jeke baspasóz máslıhatynda aıtatynymdy birneshe márte málimdegen bolatynmyn», - dep qosty ol.
Eske salaıyq, 9 qyrkúıek kúni Máskeýde ýkraındyq boksshy Germanııa ókili Manýel Charrmen bolǵan aıqasta chempıon ataǵyn qorǵap qalǵan bolatyn. Jáne sol kezde Klıchko kásibı mansabyn aıaqtaıtyndyǵyn jáne ol týraly qosymsha habarlaıtyndyǵyn aıtty.
Aıta keteıik, Ýkraınanyń zertteý ınstıtýttarynyń júrgizgen zertteýleriniń nátıjesinde Klıchko Ýkraına prezıdentine úmitkerlerdiń arasynda ekinshi orynda tur. Eger saılaý jýyr arada bolsa, onda Klıchkoǵa saılaýshylardyń 11,9 paıyzy daýys berer edi, al qazirgi prezıdent Vıktor ıAnýkovıchti 22,1 paıyzy qoldaıdy dep eseptelgen.
Al bul tusta brıtandyq aýyr salmaqty boksshy Devıd Heı «Klıchko menimen qolǵap túıistirýden qashyp, saıasatqa ketip qaldy» dep málimdegen. Onyń aıtýynsha, Klıchko ómirindegi «eń kúshti ári iri jekpe-jeginen» jaltarý úshin ýkraına parlamentindegi saılaýdy syltaýratpaýy kerek. Bul týraly Boxingscene ınternet basylymy habarlaıdy.
41 jastaǵy Klıchkonyń menedjeri Bernt Bente onyń klıenti Ýkraınadaǵy saılaýdan keıin saıasatqa yqpal ete alatyndaı kúsh alsa, sportpen qoshtasatyndyǵyn jasyrmaıdy. «Demokratııa men jemqorlyqqa qarsy kúres Devıd Heımen jekpe-jekten anaǵurlym mańyzdyraq» deıdi ol.
Heı WBA (Dúnıejúzilik boks assatsıatsııasy) nusqasy boıynsha chempıon bolǵan, alaıda 2011 jyly Vladımır Klıchkomen jekpe-jekte bul ataǵynan aıyrylyp qalǵan. Osydan keıin ol Vıtalıı Klıchkomen qolǵap túıistirgisi keletinin málimdegen bolatyn.
Vıtalıı Klıchko kásibı boks sharshy alańynda barlyǵy 47 jekpe-jek ótkizdi. Onyń 45-inde (41 nokaýt) jeńiske jetip, 2 ret jeńilgen.
