Vıtalıı Klıchko kásibı bokstan ketedi
ASTANA. 21 aqpan. QazAqparat - Ýkraınanyń ataqty boksshysy, WBC nusqasy boıynsha álem chempıony Vıtalıı Klıchko jýyrda sportpen qosh aıtysatynyn málim etti, dep habarlady Utro.ru saıty.
Boksshy eń kóbi 1-2 jekpe-jek ótkizip, sosyn bokstan múlde ketetinin basa aıtqan.
Qyryqtyń qyrqasyna shyqqan chempıon bokstan ózi ketkenmen, inisi Vladımırdiń rıngte onyń ornyn joqtatpaıtynyna senimdi. Esterińizge sala keteıik, ekeýiniń jas aıyrmasy - 5 jas.
Vıtalıı Klıchko kásibı boks rınginde 45 jekpe-jek ótkizip, 43 ret jeńiske jetken. Al onyń 40-ynda qarsylasyn nokaýtpen qulatqan. Áýeskoı boksta 210 ret rıngke shyǵyp, tek 15-inde ǵana jeńilis kórgen.
Ol bokstan ketetini týraly 2005 jyly aýyr jaraqat alǵan kezde aıtqan bolatyn. Alaıda 2008 jyly rıngke qaıta oraldy.
