Vıtalıı Klıchko bokspen qoshtasty
ASTANA. 24 qyrkúıek. QazAqparat - Ýkraındyq aýyr salmaqtaǵy boksshy Vıtalıı Klıchko Donetskide ótken baspasóz máslıhatynda «Men endi bokstaspaımyn», - dep málimdedi.
Bul týraly ýkraındyq «Ostrov» ınternet basylymyna silteme jasap, Lenta.rý habarlaıdy. 41 jastaǵy Klıchko sońǵy ret 2012 jyly 8 qyrkúıekte Máskeýde sharshy alańǵa shyqty. Ol germanııalyq Manýel Charramen qolǵap túıistirip, WBC (Dúnıejúzilik boks keńesi) nusqasy boıynsha chempıondyq ataǵyn qorǵap qaldy.
Úlken Klıchko birneshe chempıondyq ataǵy bar inisi Vladımır karerasyn áli de jalǵastyratynyn aıtty. «Klıchko sharshy alańǵa shyqqanda áli de talaı ret Ýkraına týy kóterilip, ánurany oınaıtyn bolady», - deıdi ol.
Charrony jeńgen soń, Klıchko budan bylaıǵy sporttyq joly 28 qazanda ótetin Ýkraınanyń Joǵarǵy Radasynyń saılaýynan keıin belgili bolatynyn aıtqan edi. Saılaýǵa Klıchkonyń «Ýdar» partııasy da qatysady.
Ýkraınanyń zertteý ınstıtýttarynyń júrgizgen zertteýleriniń nátıjesinde Klıchko Ýkraına prezıdentine úmitkerlerdiń arasynda ekinshi orynda turǵan kórinedi. Eger saılaý jýyr arada bolsa, onda Klıchkoǵa saılaýshylardyń 11,9 paıyzy daýys berer edi, al qazirgi prezıdent Vıktor ıAnýkovıchti 22,1 paıyzy qoldaıdy dep eseptelgen.
Al bul tusta brıtandyq aýyr salmaqty boksshy Devıd Heı «Klıchko menimen qolǵap túıistirýden qashyp, saıasatqa ketip qaldy» dep málimdegen. Onyń aıtýynsha, Klıchko ómirindegi «eń kúshti ári iri jekpe-jeginen» jaltarý úshin ýkraına parlamentindegi saılaýdy syltaýratpaýy kerek. Bul týraly Boxingscene ınternet basylymy habarlaıdy.
41 jastaǵy Klıchkonyń menedjeri Bernt Bente onyń klıenti Ýkraınadaǵy saılaýdan keıin saıasatqa yqpal ete alatyndaı kúsh alsa, sportpen qoshtasatyndyǵyn jasyrmaıdy. «Demokratııa men jemqorlyqqa qarsy kúres Devıd Heımen jekpe-jekten anaǵurlym mańyzdyraq» deıdi ol.
Heı WBA (Dúnıejúzilik boks assatsıatsııasy) nusqasy boıynsha chempıon bolǵan, alaıda 2011 jyly Vladımır Klıchkomen jekpe-jekte bul ataǵynan aıyrylyp qalǵan. Osydan keıin ol Vıtalıı Klıchkomen qolǵap túıistirgisi keletinin málimdegen bolatyn.
Vıtalıı Klıchko kásibı boks sharshy alańynda barlyǵy 47 jekpe-jek ótkizdi. Onyń 45-inde (41 nokaýt) jeńiske jetip, 2 ret jeńilgen.
