Vıtalıı Demıanenko Máskeýde chempıondyq ataqtaryn sátti qorǵady
ALMATY. Aqpannyń 8-i. QazAqparat /Erlik Erjanuly/ - Qazaqstandyq kásipqoı boks sheberi Vıtalıı Demıanenko ótken senbi kúni Máskeýde Búkilálemdik boks uıymynyń Tynyq muhıt aımaǵy boıynsha jáne Panazııalyq boks qaýymdastyǵynyń chempıony degen óz ataqtaryn abyroımen qorǵap qaldy,
dep habarlaıdy QazAqparat.
Onyń bul jolǵy qarsylasy argentınalyq Horhe Danıel Mıranda boldy. «Qytaılyq» degen laqap aty bar Horhe buǵan deıin 34 kezdesý ótkizip, onyń 25-in óz paıdasyna sheshken bolatyn. 12 raýndtyq jekpe-jekte qaptaldaǵy úsh qazy da biraýyzdan (120-108, 120-109, 120-108) Vıtalııdi jeńimpaz dep tapty. Bul onyń 19-shy jeńisi. 2004 jylǵy Afıny olımpıadasynan keıin nesibesin kásipqoı boks rınginde taýyp júrgen V. Demıanenko ázirge birde-bir ret jeńilistiń aşy dámin tatqan joq. Alty jyldyń ishinde Búkilálemdik boks uıymynyń Tynyq muhıt aımaǵy boıynsha jáne Azııa boks keńesi men Panazııalyq boks qaýymdastyǵynyń chempıony degen ataqtardy ıelendi.
