Vıtalıı Demıanenko Máskeýde chempıondyq ataqtaryn qorǵaıdy
ALMATY. Qańtardyń 13-i. QazAqparat /Erlik Erjanuly/ - Aqpannyń 6-sy kúni Máskeýde Vıtalıı Demıanenko kásipqoı bokstyń Búkilálemdik boks keńesiniń Azııa boks keńesi (WBC Asian Boxing Council), Búkilálemdik boks uıymynyń Tynyq muhıt aımaǵy (WBO Asia Pacific) jáne Panazııalyq boks qaýymdastyǵy (RAVA) nusqalary boıynsha chempıondyq ataqtaryn qorǵaıdy,
dep habarlaıdy QazAqparat.
Onyń bul jolǵy qarsylasy Horhe Danıel Mıranda bolmaq. 1983 jyly tamyzdyń 28-i kúni Kordovada dúnıege kelgen argentınalyq sportshy kásipqoı bokstaǵy alǵashqy jekpe-jegin 2003 jyly tamyzdyń 15-inde ótkizgen bolatyn. Qytaılyq degen laqap aty bar ol osy ýaqytqa deıin 33 jekpe-jek ótkizip, onyń 25-inde qarsylastarynan basym tústi.
Sońǵy jekpe-jegin mamyrdyń 16-sy kúni AQSh-tyń Soltústik Karolına shtatyndaǵy Reılı qalasynda amerıkandyq Pol Delgadomen ótkizgen Vıtalıı Demıanenkonyń bul 18-shi saıysy bolmaq. Sporttaǵy alǵashqy qadamyn dzıýdodan bastaǵan Vıtalıı boks qolǵabyn 13 jasynda kıgen bolatyn. Aleksandr Anıkınnen tálim alǵan ol 16 jasynda jastar arasynda el chempıony atanyp, sport sheberi dárejesin ıelendi. Keıin óz baǵyn Erik Jaılaýovtyń promoýterligimen kásipqoı boks rınginde synap, az ýaqyttyń ishinde tolaǵaı tabystarǵa qol jetkizdi. Osy ýaqytqa deıin ol 17 jekpe-jek ótkizip, onyń bárin óz paıdasyna sheshti. Qazaqstannyń kásipqoı boks federatsııasynyń prezıdenti Vıktor Demıanenkonyń aıtýynsha, 27 jastaǵy Vıtalıı endi Bolat Mankenovtiń promoýterligimen sharshy alańǵa shyqpaq. Óz ataǵyn sátti qorǵap shyqsa qazaqstandyq bylǵary qolǵap sheberi aldaǵy jekpe-jekterdiń birinde Álem chempıony ataǵyna talasýǵa tolyq múmkindigi bar.
