Vırýstyq gepatıtpen aýyratyndardy anyqtaý kólemi jyl saıyn artatyn bolady- vıtse-mınıstr
ASTANA. 15 qyrkúıek. QazAqparat - Elimizde gepatıtterdiń barlyq túrlerin adam aǵzasynda asqynbaı turǵynda bastapqy kezeńde anyqtaý óte mańyzdy.
Bul týraly búgin Astanada halyqaralyq sarapshylardyń qatysýymen ótip jatqan Qazaqstan gepatologtarynyń birinshi sezi aıasyndaǵy baspasóz máslıhatynda QR Densaýlyq saqtaý vıtse-mınıstri Erik Baıjúnisov málim etti.
«Vırýstyq gepatıt ol vırýstyq ınfektsııa, ıaǵnı tumaý, sondaı-aq AQTQ jáne JQTB sekildi vırýs bolyp tabylady. Bular adamnan adamǵa juǵatyn ınfektsııalyq aýrýlar. Sondyqtan da bul problemalar barsha álemde ózekti bolyp sanalady. Biz búginde elimizdegi jalpy adam ólim-jitimin tómendetý men ómir uzaqtyǵyn uzartýda sapalyq jaǵdaıdy arttyrýdy qaperge ala otyryp, adam ólimine ákelip soqtyratyn barlyq faktorlarmen kúresýimiz shart. Onyń aıasynda qan aınalymy júıesiniń dertteri men onkologııalyq aýrýlardy emdeý boıynsha belsendi aınalysýdamyz jáne bul turǵyda jaqsy nátıjeler bar. Endi kelesi kezeń ol gepatıtpen kúreske negizdelgen»,-dep atap ótti ol.
Bul turǵyda E. Baıjúnisov osy oraıda elimizde gepatıtterdiń barlyq túrlerin adam aǵzasynda asqynbaı turǵynda bastapqy kezeńde anyqtaý óte mańyzdy ekenin basa aıtty.
«Kóptegen BAQ-tar «S» gepatıti Qazaqstanda taıaýda ǵana paıda boldy dep shyndyqqa sáıkes kelmeıtin málimetterdi jarııalap jatady. Bul aýrý árqashan da bolǵan, alaıda bizdiń otandyq densaýlyq saqtaý salasy dertti ýaqytynda anyqtaý múmkindigine qol jetkize almaǵan. Búginde elimizdiń tehnologııasy aýrýdy anyqtaý jolynda keń múmkindikterdi ashyp otyr. Respýblıkanyń óńirlerinde 16 gepatologııalyq ortalyq bar jáne onda skrınıngtik zertteýlerdiń barlyq nátıjesi qaralady»,-dep toqtalǵan vıtse-mınıstr: «Atap aıtqanda, osy turǵyda vırýstyq gepatıtpen aýyratyndardy anyqtaý kólemi jyl saıyn artatyn bolady. Buny jaman kórsetkish dep sanaýǵa bolmaıdy»,-dedi.
Sebebi, jańa tehnologııalar arqyly dertke shaldyqqandardy erte kezeńde anyqtaý múmkindigi ashylyp otyr.
«Endi bizdiń maqsat - atalǵan aýrýdyń aldyn alýdyń profılaktıkasy boıynsha tetikterdiń keshenin ázirleý, halyqty profılaktıkanyń negizderine úıretý»,-dedi ol.
