Vırýstyq gepatıtten qalaı qorǵanýǵa bolady
ASTANA. KAZINFORM – Bıylǵy jyldyń jeti aıynda Astana qalasynda jedel vırýstyq V gepatıtiniń 6 jaǵdaıy jáne jedel vırýstyq S gepatıtiniń 14 jaǵdaıy tirkeldi. Osyǵan baılanysty vırýstyq gepatıtti juqtyrý qaýpin qalaı azaıtýǵa bolatyny týraly Astana qalasynyń Sanıtarııalyq-epıdemıologııalyq baqylaý departamenti basshysynyń orynbasary Janna Pralıeva aıtyp berdi.
Onyń aıtýynsha, jedel vırýstyq V gepatıtimen syrqattanýshylyq kórsetkishi 100 myń turǵynǵa shaqqanda 0,38 boldy. Bul ótken jyldyń osy kezeńimen salystyrǵanda 28 paıyzǵa tómen. Sonymen qatar 14 jasqa deıingi balalar arasynda bir aýrý jaǵdaıy tirkelgen.
Al jedel vırýstyq S gepatıtimen 14 adam aýyrǵan. Balalar arasynda mundaı jaǵdaılar anyqtalmaǵan. Aýrýshańdyq kórsetkishi 100 myń turǵynǵa shaqqanda 0,89-ǵa jetip, ótken jylǵy deńgeıden 1,4 ese joǵary boldy.
– Vırýstyq V jáne S gepatıtteri baýyrdy zaqymdaıtyn qaýipti juqpaly aýrýlar. Vırýs aǵzaǵa zaqymdanǵan teri nemese shyryshty qabyq arqyly engen kezde juǵady. Infektsııanyń kózi – aýrýdyń jedel nemese sozylmaly túrimen aýyratyn adam, sondaı-aq vırýs tasymaldaýshysy, – dedi maman.
Sonymen qatar Janna Pralıeva juqtyrý kóbinese juqtyrylǵan qanmen baılanys kezinde, qorǵanyssyz jynystyq qatynas arqyly, zararsyzdandyrylmaǵan medıtsınalyq jáne kosmetologııalyq quraldardy qoldanǵanda, sanıtarııalyq talaptar saqtalmaǵan jaǵdaıda tatýırovka nemese pırsıng jasatqanda, ustara, tis şetkasy jáne basqa da jeke gıgıena quraldaryn ortaq paıdalanǵanda, sondaı-aq bosaný kezinde anadan balaǵa beriletinin atap ótti.
Onyń aıtýynsha, vırýstyq V jáne S gepatıtteri kóbine eńbekke qabiletti jastaǵy adamdar arasynda anyqtalady. Aýrýǵa shaldyqqandardyń shamamen 64 paıyzy 20-40 jas aralyǵyndaǵy azamattar. Bul ınfektsııanyń berilý joldarynyń ereksheligimen baılanysty.
Sondaı-aq ol aýrýdyń alǵashqy kezeńderinde eshqandaı belgisiz ótýi múmkin ekenin eske saldy. Álsizdik, tez sharshaǵyshtyq, tábettiń tómendeýi, oń jaq qabyrǵa astyndaǵy aýyrlyq nemese aýyrsyný, júrek aıný, bulshyqet pen býyndardyń syrqyraýy, teri men kózdiń aq qabyǵynyń sarǵaıýy, zárdiń qoıýlanyp, nájistiń tússizdenýi baıqalsa, mindetti túrde dárigerge qaralý qajet.
Janna Pralıeva V gepatıtiniń aldyn alýdyń eń tıimdi joly – vaktsına saldyrý. Qazaqstanda ekpeler Ulttyq profılaktıkalyq egý kúntizbesi aıasynda tegin júrgiziledi. Náresteler alǵashqy dozany ómiriniń alǵashqy táýliginde alady, al kelesi dozalar eki jáne tórt aılyq kezinde egiledi dedi.
Sonymen qatar V gepatıtine qarsy vaktsına ınfektsııa oshaǵyndaǵy baılanysta bolǵan adamdarǵa aldyn ala tekserýden keıin, sondaı-aq medıtsına qyzmetkerlerine 0-1-6 aılyq shema boıynsha egiledi.
Qazirgi ýaqytta vırýstyq S gepatıtine qarsy vaktsına joq. Sondyqtan bul aýrýdyń aldyn alýda arnaıy emes profılaktıka sharalarynyń mańyzy erekshe.
Mamandar medıtsınalyq jáne kosmetologııalyq qyzmetterdi tek lıtsenzııasy bar uıymdarda alýǵa, sterıldi nemese bir ret qoldanylatyn quraldardyń paıdalanylýyn qadaǵalaýǵa, kezdeısoq jynystyq qatynastan saqtanýǵa jáne tosqaýyldyq qorǵanys quraldaryn qoldanýǵa, ózgeniń jeke gıgıena zattaryn paıdalanbaýǵa keńes beredi. Al medıtsına qyzmetkerleri ınfektsııalyq qaýipsizdik talaptaryn saqtap, V gepatıtine qarsy tolyq vaktsınatsııa kýrsynan ótýi tıis.
Janna Pralıeva ýaqytyly vaktsına saldyrý, jeke bas gıgıenasyn saqtaý, sterıldi quraldardy paıdalaný jáne óz densaýlyǵyna jaýapkershilikpen qaraý vırýstyq gepatıtterdi juqtyrý qaýpin edáýir tómendetip, aýrýdyń aýyr asqynýlarynyń aldyn alýǵa múmkindik beretinin atap ótti.
Buǵan deıin A gepatıtinen qalaı saqtaný qajet ekenin jazǵanbyz.
