Vırýstardyń mýtatsııalanýyna orynsyz antıbıotık qoldaný sebep bolýy múmkin

ASTANA. KAZINFORM – Elimizde jedel respıratorlyq vırýstyq ınfektsııaǵa (JRVI) shaldyqqandar sanynyń artýyna baılanysty pedıatr-ınfektsıonıst Raýshan Nurbolatqyzy Jibek Joly telearnasynyń «Búgin live» baǵdarlamasynda pikir bildirdi.

Mamannyń aıtýynsha, vırýstar ýaqyt óte kele ózderiniń qurylymdyq erekshelikterin ózgertip otyrady.

– Qazirgi vırýstardyń mýtatsııalanýy túrli sebepterge baılanysty bolady. Mysaly, syrqat kezinde antıbıotıkterdi nemese belsendi áseri bar dári-dármekterdi orynsyz qoldaný vırýstyń túrlenýine ákelýi múmkin. Sondaı-aq durys emes em-dom júrgizý nátıjesinde vırýstyń klınıkalyq kórinisi ózgerip otyrady, – dedi dáriger.

Raýshan Nurbolatqyzynyń sózinshe, árbir vırýstyń ózine tán qorǵanysh qabyǵy – kapsýlasy bar, sondyqtan qarapaıym vırýstyń ózi keı jaǵdaıda vırýsqa qarsy emge kónbeıdi. Bul jyl boıyna kezdesetin vırýstardyń barlyǵyna tán qubylys.

– Vırýstardyń belsendiligi, ádette, kúz mezgilinde artady. Osyǵan baılanysty biz jyl saıyn 1 qyrkúıekten bastap vırýsqa qarsy arnaıy ekpelerdi júrgizemiz. Bul ekpeni 6 aıdan asqan barlyq bala ala alady, – dedi maman.

Dáriger ekpeden keıingi sımptomdar týraly da túsindirip ótti.

– Ekpeden keıin 5-7 kún ishinde aǵzada jeńil sımptomdar baıqalýy múmkin. Sebebi vaktsınanyń quramyndaǵy vırýstyń bólshegi engizilgennen keıin ımmýndyq júıe antıdeneler túzip, oǵan jaýap beredi. Bul qalypty jaǵdaı. Mańyzdysy – ekpe alatyn adamnyń sol sátte vırýstyq nemese basqa jedel aýrý belgileri bolmaýy qajet. Sonda ǵana ekpeniń zııany bolmaıdy. Degenmen ekpe alǵannan keıin múlde aýyrmaıdy degen túsinik durys emes, vaktsına tek aýrýdyń jeńil ótýine yqpal etedi, – dep túsindirdi pedıatr-ınfektsıonıst.

Maman tumaý men JRVI arasyndaǵy aıyrmashylyqtarǵa da toqtaldy.

– Kez kelgen vırýstyq aýrý, sonyń ishinde tumaý da, ádette, dene qyzýynan bastalady. Tumaý vırýsy JRVI-ǵa qaraǵanda aýyr ótedi. Ekeýinde de qyzý kóteriledi, biraq tumaý kezinde temperatýra 40 gradýsqa deıin jetýi múmkin. Sonymen qatar tumaýda dene syrqyrap, býyndar aýyrady, jalpy ıntoksıkatsııalyq belgiler aıqyn baıqalady, – dedi dáriger.

Raýshan Nurbolatqyzynyń aıtýynsha, aýrýdyń aldyn alýdyń eń tıimdi joly – ımmýndyq júıeni kúsheıtý.

– Immýnıtetti joǵary deńgeıde ustaý úshin aǵzaǵa qajetti dárýmenderdi jyl boıy qabyldaý qajet, – dep qorytyndylady maman.

Buǵan deıin Astanada maýsym basynan beri 27 myńnan astam JRVI jaǵdaıy tirkelgenin jazǵanbyz.