Vırýstan zardap shekken paıdalanýshylarǵa qoldaý kórsetiledi - resmı ókil
ASTANA. QazAqparat - Aqparat jáne kommýnıkatsııalar mınıstrliginiń aıasynda jumys isteıtin www.cert.kz saıty WannaCry vırýsynan zardap shekken memlekettik organdardyń, kompanııalardyń ǵana emes jeke azamattardyń da ótinimderin qabyldaıdy. Bul týraly búgin Aqparat jáne kommýnıkatsııalar mınıstrliginiń resmı ókili Albına Aten habarlady.
Eske sala ketsek, 12 mamyr kúni MS Windows-tyń barlyq nusqalaryna baǵyttalǵan WannaCry vırýsy jappaı shabýyl jasady. Az ǵana ýaqytta vırýs álemniń 150 elindegi 200 myń kompıýterdi zaqymdap úlgergen. Qazaqstandaǵy iri kompanııalardyń kompıýterleri de vırýstyq shabýylǵa ushyrady. 13-16 mamyr kúnderi Qazaqstanda júzden astam kompıýterlerdiń WannaCry vırýsyn juqtyrǵany jaıly habarlandy.
«Atalǵan vırýstan zardap shekken uıymdardan jáne jeke azamattardan mınıstrlikke kelip túsken hattar men qońyraýlar tolastar emes. Osy oraıda, Qazaqstanda kompıýterlik oqıǵalar boıynsha aqparatty jınap, taldaý jasaıtyn, kompıýterge tóngen qaýiptiń aldyn alýda tehnıkalyq jáne keńes berý qyzmetin kórsetetin www.cert.kz saıtynyń jumys isteıtinin eske salǵym keledi. Vırýstyq shabýyl boıynsha sońǵy jańalyqtar osy saıtqa júktelip otyrady. Mınıstrlik aıasyndaǵy bul qyzmet vırýstan zardap shekken memlekettik organdar men kompanııalarǵa ǵana emes, jeke azamattarǵa da kómek kórsetedi. Zardaptardan qorǵaný úshin jáne qajetti aqparat alý úshin saıtta kórsetilgen baılanys telefondaryna habarlassańyz bolǵany», - dedi mınıstrlik ókili.
Aıta keteıik, búgin Ortalyq kommýnıkatsııalar qyzmetiniń resmı ókiliniń apta saıynǵy brıfıngi ótti. Onda aptanyń eń mańyzdy is-sharalary týraly habarlama berildi jáne ortalyq memlekettik organdardyń baspasóz hatshylary men resmı ókilderi jýrnalıster qoıǵan saýaldarǵa jaýap berdi .
