Vırýspen kúreste biz birgemiz – Qytaı dárigerleri
ALMATY. QazAqparat – Búginde epıdemıologııalyq ahýal kúrdeli óńir – Almatyǵa Qytaıdan medıtsına mamandary keldi. Sheteldik sarapshylar koronavırýspen kúreste tájirıbe bólisedi, dep habarlaıdy QazAqparat tilshisi.
Búgin pýlmonologııa, epıdemıologııa, qoǵamdyq densaýlyq saqtaý salasynyń 10 bilikti mamany Sanjar Asfendııarov atyndaǵy qazaq ulttyq medıtsınalyq ýnıversıtetiniń ujymymen, Almaty ákimdiginiń ókilderimen, QR DSM ókilderimen vıdeo kezdesý ótkizdi.
Onlaın rejimde ótken kezdesý barysynda ýnıversıtet basshysy Talǵat Nurǵojın qytaılyq dárigerlerge tájirıbesimen bóliskeni úshin alǵys bildirdi.
«Biz Qytaılyq áriptesterimizdiń kelgenine qýanyshtymyz. Sizderdiń tájirıbelerińiz bizdiń eldegi dertpen kúreske septigin tıgizedi dep senemiz. Sizderden álde de dıagnostıka men emdeý týraly maǵlumat bilgimiz keledi», - dedi Talǵat Nurǵojın.
Jıyn barysynda qalalyq Qoǵamdyq densaýlyqsaqtaý basqarmasynyń basshysy Tileýhan Ábildaev qaladaǵy epıdemıologııalyq ahýaldy baıandap berdi.
«Qazir Almatyda koronavırýstyń 525 jaǵdaıy tirkelgen. 100 myń adamǵa shaqqanda kórsetkish 25,6% bolyptur.
Baılanysta bolǵandardyń 90%-nan vırýs tabyldy. 85 adam jazylyp shyqqan. Bul aýyrǵandardyń shamamen 16,6%-y bolyp tur. Birinshi jaǵdaı tirkelgeli beri Almatyda juǵý deńgeıi 2-58 % aralyǵynda bolyp tur. Kópshiligi 13,14 sáýir kúnderi anyqtalǵan. Aýrý kórsetkishi tolqyndy túrde kórinis berip keledi. Almatyda 6 zerthanada PTsR tásilimen dıagnostıka jasalyp jatyr. Olar kúnine 1500 zerthanalyq taldaý jasaı alady. Qalada ınfektsııalyq statsıonarlarda 800 tósek oryn bar. Qazir olardyń 54 %-y ǵana tolǵan. 5 adam qaıtys bolsa, 85 adam jazylyp shyqty. Onyń 4-i bala», - dedi Tileýhan Ábildaev.
Qytaıdan kelgen medıtsına mamandary Almaty dárigerleriniń koronavırýspen kúres deńgeıin óte joǵary baǵalady.
Olar dıagnostıka men emdeý salasynyń qaı oblystarynda jumysty kúsheıtýge keńes berdi.
«Aldymen baılanysta bolǵan adamdardy tap basyp anyqtaý kerek. Dıagnostıkalyq múmkindikti kúsheıtý kerek. Almatyda juqtyrǵan adamdardyń teń jartysy medıtsına mamandary eken. Olardy qorǵanys sharalaryna úıretý kerek», - dedi qytaılyq mamandar.
«Áriptesterimniń pikirimen kelisem. Bas sanıtarlyq dárigerdiń tapsyrmasymen qaladaǵy barlyq medıtsınalyq mekemeler provızorlyq rejimge kóshedi. Barlyq medıtsına mamandary jeke qorǵanys quraldarymen qamtylatyn bolady. Sonymen qatar, QR Qorǵanys mınıstrliginiń gospıtalderin qosqanda tósek oryndy 1000 – ǵa jetkize alamyz. Sonymen qatar 280 orynǵa arnalǵan modýldi gospıtal salynyp jatyr. Zerthanalarda taldaý múmkindigin kúnine 3000 testke jetkize alady», - dedi basqarma basshysy T.Ábildaev.
Qytaılyq mamandar vıdeokonferentsııa sońynda qazaqstandyqtarǵa vırýsty jeńip shyǵýǵa tilek bildirdi.
«Vırýs shekarany bilmeıdi. Vırýspen kúreste bizdiń dostyǵymyz aıqyndala túspek», - dedi sheteldikter.
