Vırýsqa qarsy preparattardy dárigerdiń nusqaýymen ǵana qabyldaý kerek – ınfektsıonıst
ALMATY. QazAqparat - Almaty qalasy Qoǵamdyq densaýlyq saqtaý basqarmasynyń shtattan tys bas ınfektsıonısi, «I.Jekenova atyndaǵy qalalyq klınıkalyq juqpaly aýrýlar aýrýhanasy» ShJQ MKK dáriger-sarapshysy Tamara Utaǵanova onlaın brıfıng barysynda COVID-19 jáne jedel respıratorlyq vırýstyq aýrýlardyń belgileri týraly aıtty, dep habarlaıdy QazAqparat tilshisi.
Onyń sózinshe, barlyq qajetti em dárigerdiń taǵaıyndaýy boıynsha júrgizilýi kerek.
«Eger JRVI nemese koronavırýs ınfektsııasynyń belgileri baıqalsa birden dárigerge qaralý qajet. Dene qyzýy joǵarylap, qatty bas aýrýy mazalap, júrek aıný jáne qusý, entigý paıda bolǵan kezde jedel járdem shaqyrý kerek. Eshbir jaǵdaıda óz betimen emdelýge bolmaıdy. Vırýsqa qarsy preparattardy dárigerdiń nusqaýy boıynsha qabyldaǵan durys», - dedi dáriger.
Búgingi kúni Almaty qalasy boıynsha 562 adam statsıonarlyq em qabyldaýda, onyń 23-i – bala.
«Eger naýqasta sozylmaly nemese ilespe aýrýlar bolsa, koronavırýs asqynǵan túrde ótedi. Sondyqtan mundaı naýqastarǵa densaýlyqty únemi baqylaýda ustaý qajet», - dep qosty spıker.
Sonymen qatar, ol Telemedıtsına ortalyǵynyń qyzmetkerleri kún saıyn barlyq naýqastyń densaýlyǵyn baqylap otyratynyn atap ótti.
«Telemedıtsına ortalyǵynyń mamandary naýqastardyń densaýlyǵyn baqylap otyrady. Bul tizimde sımptomsyz naýqas retinde tirkelgender de bar. Koronavırýsqa shaldyqqandardyń barlyǵy qaıtadan aýyryp qalýy múmkin ekenin este ustaǵan jón. Sondyqtan profılaktıkalyq sharalardy jalǵastyrý kerek. Bul maska kııý, áleýmettik qashyqtyqty saqtaý jáne barlyq ózge de saqtyq sharalary», - dep qorytyndylady Tamara Utaǵanova.
