Vırýs juqtyrýy múmkin ár adamǵa 2-3 test júrgizemiz - Eljan Birtanov

NUR-SULTAN. QazAqparat - Elimizde koronavırýsty anyqtaıtyn qosymsha 60 myń test alynady. Bul týraly Ortalyq kommýnıkatsııalar qyzmeti alańynda QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Qazirgi ýaqytta koronavırýs 120 memleketke tarady. Qazaqstan Qytaımen shekaralas jatyr. Soǵan qaramastan arnaıy qabyldanǵan sharalardyń arqasynda elimizde osy ýaqytqa deıin koronavırýs anyqtalǵan joq»,- deıdi QR Premer-Mınıstriniń orynbasary Eraly Toǵjanov.

Sondaı-aq, QR Densaýlyq saqtaý mınıstri Eljan Birtanov koronavırýs adam qanynan birinshi kúni anyqtalmaıtynyn jetkizdi.

«Birneshe memleketten kelgen azamattar baqylaýda. Koronavırýs adam qanynan birinshi kúni tabylmaıdy, sol sebepti biz olardy baqylaýda, qajet bolsa 14 kún karantınde ustaımyz. Bizdiń protokol boıynsha, adamnan birinshi jáne onynshy kúni qan alynyp, tekseriledi. Qazirgi kezde bizdiń barlyq óńirde arnaıy sanıtarlyq-epıdemıologııalyq zerthanalar jumys júrgizýde. Reseı Federatsııasy, QHR, DSUU jibergen jáne qazaqstandyq test bar. Jalpy 15 myń test bolǵan, onyń 5 myńyn paıdalandyq. Qosymsha 60 myń test alamyz. Árbir naýqasty 2-3 testpen tekseremiz. Bul testter naqty kórsetkishterdi kórsetip, jaqsy jumys isteıdi. Bul jumystar ary qaraı da jalǵasady», - deıdi ol.