Vırýs juqtyrǵanyna senbeıtin adamdar bar – dáriger
AQTÓBE. QazAqparat – Aqtóbede medıtsınalyq ýnıversıtettiń rezıdentteri koronavırýspen kúres jumystary kezinde indet juqtyrǵanyna senbegen adamdardyń da bolǵanyn jasyrmady. Olar derttiń qanshalyqty qaýipti ekenin túsindirdi, dep habarlaıdy QazAqparat tilshisi.
Marat Ospanov atyndaǵy BQMÝ rezıdentteri «COVID-19» vırýsymen kúres jumystaryna jumyldyryldy. Olar oblystaǵy úsh emdeý ornyna bólingen. Іndet juqtyrǵandar jáne olarmen baılanysta bolǵan adamdarǵa járdem bergen rezıdent-ınfektsıonıster Gúlnur Aıaǵanova jáne Ádilbek Mahash qazirgi kúni ınfektsııalyq gospıtalda jumys istep júr. Ekeýi de úılerinen jyraqta em júrgizýge májbúr.
«Koronavırýs ınfektsııa dıagnozy rastalǵan jaǵdaıda keıbiri synama nátıjesine kúmándanady. Sebebi olar ón boıynan eshqandaı ózgeshelik baıqamaıdy, densaýlyǵyna shaǵym aıtpaıdy. Mundaı jaǵdaıda biz patsıenttermen áńgime júrgizemiz, koronavırý ınfektsııasynyń esh belgisiz, jeńil formada, sondaı-aq ortasha aýyr jáne aýyr jaǵdaıda ótetinin túsindiremiz. Keıbiri ózi aýyrmaıdy, biraq taratýshy. Ásirese sozylmaly aýrýy bar, egde jastaǵy adamdarǵa qaýipti», - deıdi Gúlnur Aıaǵanova.
Joǵary oqý ornynyń baspasóz qyzmetiniń habarlaýynsha, rezıdentter patsıentterdi baqylaý jáne emdeý sharasyn jalǵastyrady. Karantındegi patsıentterge kómek kórsetý jas mamandar úshin tájirıbe, al rezıdentter biliktiligin shyńdady.
