Almaty oblysynda VIP-klıentterge esirtki satqan top ustaldy
ASTANA. KAZINFORM — Almaty oblysynda polıtsııa avtomattandyrylǵan júıemen jabdyqtalǵan jasyryn esirtki zerthanasyn joıdy. Arnaıy operatsııa barysynda 29 túp qarasora, 27 keli daıyn esirtki, qarý-jaraq pen 3 mıllıon teńge tárkilenip, qylmystyq toptyń eki múshesi ustaldy. Bulsh týraly Polisia.kz jazdy.
— «Qarasora — 2026» operatsııasy aıasynda ІІM esirtki qylmysyna qarsy is-qımyl komıtetiniń qyzmetkerleri Almaty oblysynyń polıtsııa departamentimen birlesip, esirtkini zańsyz óndirýdiń tolyq tsıklin uıymdastyrǵan qylmystyq toptyń áreketin toqtatty. Qylmystyq top quramynda esirtkisi bar ósimdikterdi jasyryn ósirýden bastap daıyn ónimdi VIP-sanattaǵy klıentterge ótkizýge deıingi barlyq kezeńdi júzege asyrǵan. Joıylǵan fıtozerthana avtomattandyrylǵan jeldetý júıesimen, temperatýrany, jaryqtandyrýdy jáne sýarýdy baqylaıtyn datchıktermen jabdyqtalǵan. Onda jyl boıy quramynda esirtkisi bar ósimdikterdiń joǵary kontsentratsııaly suryptary ósirilgen, — dedi ІІM esirtki qylmysyna qarsy is-qımyl komıtetiniń basqarma bastyǵy Baqytjan Ámirhanov.
Jasyryn jeke kireberisi bar jertóleni tintý barysynda 29 túp qarasora, 27 kg daıyn ónim, ósirýge arnalǵan zamanaýı jabdyq, elektrondyq aqparat jetkizgishter, baılanys quraldary, qylmystyq jolmen alynǵan úsh mıllıon teńge kólemindegi qarajat, sondaı-aq oq-dárileri bar tirkelmegen qarý tárkilendi.
— Atalǵan fıtozerthananyń uıymdastyrýshysy — 40 jastaǵy er adam uzaq ýaqyt boıy kannabıs tobyna jatatyn esirtkilerdi ósirý tehnologııasyn jan-jaqty zerttep, jer teliminde aýdany 100 sharshy metrden asatyn arnaıy salynǵan jeke ǵımaratta jasyryn óndiristi keńeıtýdi josparlaǵan. Osy maqsatta ol alys shet memleketterge arnaıy baryp, sala mamandarynan keńes alǵan, kannabıstiń elıtalyq suryptaryn ósirýge arnalǵan arnaıy jabdyqtarǵa tapsyrys bergen, zamanaýı tehnologııalardy engizip, quramynda esirtkisi bar joǵary kontsentratsııaly shıkizatty kannabınoıdtyq ekstraktilerge, ıaǵnı gashısh maıyna qaıta óńdeý tásilderin jetildirgen. Jedel-tergeý is-sharalary barysynda onyń qylmystyq baılanysy anyqtalyp, buryn asa aýyr qylmystar jasaǵany úshin birneshe ret sottalǵan 45 jastaǵy er adam ustaldy. Onyń garajyn tintý kezinde skotchpen oralǵan 4 kg gashısh, sondaı-aq bólshektep býyp-túıilgen esirtki ónimderi, zip-paketter jáne esirtki tutynýǵa arnalǵan quraldar tárkilendi. Qylmystyq syzbanyń barlyq qatysýshylaryn, jabdyqtar men tuqymdyq materıaldardy jetkizý arnalaryn, sondaı-aq ózge de zańsyz áreketterdi anyqtaýǵa baǵyttalǵan tergeý áreketteri júrgizilýde. Іs boıynsha ustalǵan kúdiktiler ýaqytsha ustaý ızolıatoryna qamaldy. Qylmystyq jolmen satyp alynǵan jyljymaıtyn múlikke, qymbat avtokólikterge tergep-tekserý aıasynda tyıym salyndy. Esirtkini zańsyz óndirý men daıyndaý faktileriniń jolyn kesý baǵytyndaǵy jumys jalǵasatyn bolady, — dedi spıker.
