Vınokýrovtyń velosıpedi UCI akkredıtatsııasyn aldy
ASTANA. QazAqparat - Olımpıada chempıony ári eń bedeldi álemdik jarystardyń jeńimpazy jáne júldegeri Aleksandr Vınokýrov negizin qalaǵan qazaqstandyq VINO brendimen shyqqan kásipqoı shosselik velosıpedter Halyqaralyq velosıpedshiler odaǵynyń (UCI) akkredıtatsııasyn aldy, dep habarlaıdy «SPORTINFORM» SAA.
UCI-diń arnaıy komıssııasy velosıpedti bir aı boıy tekserip, halyqaralyq uıymnyń barlyq talaptaryna saı ekenin málimdedi. Osy akkredıtatsııa sportshylarǵa UCI aıasynda ótetin eń bedeldi velojarystarǵa otandyq marka velosıpedterimen qatysýǵa ruqsat beredi. 2018 jyldan bastap Vino - Astana Motors qurlyqtyq komandasynyń veloshabandozdary VINO ATM velosıpedterimen jarysqa shyǵady.
«Bul qyzmetimizdiń damýynyń taǵy bir kezeńi boldy. Akkredıtatsııanyń berilýi VINO brendi álemdik deńgeıdegi eń joǵary talaptarǵa saı ekenin bildiredi. Sapa men qaýipsizdik - kásipqoılar úshin basty krıterııler. Jumysymyz oń baǵasyn alǵanyna qýanyshtymyn», - deıdi Aleksandr Vınokýrov.
Eske sala ketsek, VINO markaly qazaqstandyq velosıped alǵash ret Almatyda 2014 jyly tanystyrylǵan. Búgingi tańda otandyq ónim Qazaqstanda ǵana emes, shetelderde de edáýir suranysqa ıe.
