Vınokýrov Gınnestiń rekordtar kitabyna kirdi
ASTANA. 22 qańtar. QazAqparat - Soltústik Qazaqstan oblysynyń týmasy, London Olımpıadasynyń chempıony Aleksandr Vınokýrovtyń esimi «Gınnestiń rekordtar kitabyna» jazyldy, dep habarlady elimizdiń aqparat agenttikteri.
«Vıno» alǵashqy Olımpıada júldesi - kúmis medaldi 2000 jyly Sıdneıde jeńip alǵan bolatyn, al ekinshi medal, ıaǵnı altyn júldege araǵa 12 jyl salyp, 2012 jyly Londonda qol jetkizdi. «Gınnestiń rekordtar kitaby» jerlesimizdiń bul kórsetkishin rekord dep tanypty.
Aleksandr Soltústik Qazaqstan oblysyndaǵy Beskól dep atalatyn aýyldyń týmasy. Alǵashqy Olımpıada júldesin elimizge 2000 jyly alyp berdi. Jasyl qurlyqta ótken jarysta ol óziniń sol kezdegi komandalasy - «Deutche Telekom» komandasynyń kapıtany ıAn Ýlrıh jáne taǵy bir nemis sportshysy Andreas Kledenmen birge alǵa ozyp ketip, júldeli oryndardy ózara bólisken-di. ıAn altyn, Sasha kúmis, al Adreas qolany qanaǵat tutqan. Sońǵy ýaqytta Ýlrıhtyń dopıng qoldanǵany jaıly kóp aıtylyp júr, eger bul qylmysy áshkere bolsa Sıdneıdiń altyny da Vınokýrovtyń moınyna ilinýi múmkin.
Al Londonda jasy 40-qa jaqyndap qalǵan Aleksandrdan eshkim júlde kúte qoımaǵan. Alaıda 250 shaqyrymdyq jarysta bir top sportshynyń burylysta qulaǵan sátin sátti paıdalanǵan ol alǵa shyǵyp ketip, armandaǵan altynyna qol jetkizgen edi. Esterińizge sala keteıik, Aleksandr Vınokýrovtyń Sıdneıdegi kúmisi velosporttan qazaqstandyqtar utyp alǵan tuńǵysh Olımpıada júldesi, al Londondaǵy medali - tuńǵysh altyn júlde ekeni belgili. Demek, Aleksandr qandaı rekordqa da laıyq azamat, dep jazady alashainasy.kz.
