Vınokýrov bastaǵan «Astana» velokomandasy jas veloshabandozdarmen kezdesti (FOTO)
ASTANA. QazAqparat - Búgin elordadaǵy «Saryarqa» velotreginde «Astana Pro Team» komandasynyń músheleri «№6 balalar-jasóspirimder sport mektebi» oqýshylarymen kezdesti.
Jas veloshabandozdar álemde úzdik sanalatyn kásibı sportshylarmen betpe-bet emen-jarqyn suhbattasýǵa múmkindik aldy.
Jas sportshylar «Astana Pro Team» múshelerinen iri grand týrlardan keıin qalaı qalypqa keletinin jáne keleshekte qandaı josparlar qoıyp otyrǵandaryn surap jatty. Sonymen qatar sport mektebiniń tálimgerleri «Týr de Fransta» bolǵan qyzyqty jaıttar jaıynda aıtyp berýlerin ótindi. Ásirese, jetkinshekter «Týr de Frans-2014» jeńimpazy, «Astana» kapıtany Vınchentso Nıbalıǵa suraqtar jaýdyrdy. V.Nıbalı olardyń ár saýalyna tolyqqandy jaýap berýge tyrysty jáne «Astana Pro Team» klýbynyń jeńisine komandanyń saýatty jumysy, eńbegi arqasynda kelgendigin» basa aıtty.
