Vılnıýste QR Konstıtýtsııasynyń 15 jyldyǵyna oraı qabyldaý ótti

STANA. Qyrkúıektiń 1-i. QazAqparat - Qazaqstan Elshiligi tamyzdyń 27-sinde Vılnıýste Qazaqstan Respýblıkasy Konstıtýtsııasynyń 15 jyldyǵyna oraı qabyldaý uıymdastyryp, oǵan lıtva tarapynan mınıstrlikter men vedomstvolardyń basshylary, Seım depýtattary, Lıtvanyń eýroparlamentshileri, qoǵamdyq-saıası jáne isker toptardyń, zııaly qaýymnyń ókilderi, dıplomatııalyq korpýs pen Baltyq elderindegi qazaq dıasporasy qatysty.

Bul týraly Qazaqstannyń Syrtqy ister mınıstrliginiń baspasóz qyzmeti habarlady.

Elshi Ǵalymjan Qoıshybaev jınalǵan qaýymdy Konstıtýtsııa qabyldanǵannan bergi elimizdiń júrip ótken jolymen, respýblıkanyń saıası jáne áleýmettik-ekonomıkalyq damý jetistikterimen, Elbasy N.Nazarbaevtyń basshylyǵymen júzege asyrylyp jatqan negizgi syrtqy saıası bastamalarmen tanystyra kele, Qazaqstannyń aǵymdaǵy jylǵy mańyzdy mindeti - EQYU tóraǵalyǵy bolyp tabylatynyn atap kórsetti.

Dıplomat sondaı-aq, taǵy bir ataýly kún - ıAdrolyq synaqtarǵa qarsy is-qımyldyń dúnıejúzilik kúni qarsańynda, «Nevada-Semeı» halyqaralyq antııadrolyq qozǵalystaǵy belsendi jumystary úshin lıtvalyq bir top azamattyń eskertkish medaldarmen marapattalǵanyn habarlady.

Ǵalymjan Qoıshybaev sonymen birge, qazaq dıasporasynyń múshelerin Lıtva qazaqtarynyń «Nursáýle» qoǵamynyń qurylýymen quttyqtady.

Sharanyń barysynda sondaı-aq, kókshetaýlyq «Aınakól» folklorlyq ujymy óner kórsetti.