Vılnıýste qazaq ertegileri lıtva tilinde shyqty

ASTANA. QazAqparat - Lıtvadaǵy Qazaqstan Elshiligi «Rýhanı janǵyrý» baǵdarlamasy men «Uly dalanyń jeti qyry» atty maqalanyń basty qaǵıdalaryn iske asyrý aıasynda lıtva tilinde qazaq ertegileriniń jınaǵyn baspadan shyǵardy, dep habarlaıdy QazAqparat.

Endi janýarlar aıtysy, qarlyǵash pen Qańbaq shal týraly ańyzdar, Aldar kóseniń qylyqtary men qazaq ertegileriniń basqa da tanymal keıipkerleri týraly shytyrman oqıǵalar kishkentaı lıtvalyq oqyrmandar men olardyń ata-analary úshin qol jetimdi bolady.

Kitaptiń alǵashqy danalary men Rojdestvo merekesine oraılastyrylǵan syılyqtar Vılnıýs qalalyq emhanasynyń Pedıatrııa ortalyǵynda em alyp jatqan balalarǵa syıǵa berildi.
 

Balalardy kitappen tanystyra otyryp, Qazaqstan Respýblıkasynyń Lıtvadaǵy Elshisi Vıktor Temirbaev elimiz týraly qyzyqty faktilerge toqtalyp ótti. Atap aıtqanda, Elshi alma men qyzǵaldaqtyń álemge qazirgi Qazaqstan aýmaǵynan taraǵany men alǵash ret jylqyny Uly dala kóshpendileri qolǵa úıretkeni týraly áńgimelep berdi.  
 

Lıtvalyq baldyrǵandardyń birneshe býyny baǵdarlamalaryn kórip ósken tanymal tele jáne radıo dıktor Bernadeta Lýkoshıýte Pedıatrııa ortalyǵynyń jas syrqattaryna qazaq ulttyq ertegileriniń keıipkerleri týraly birneshe ertegi oqyp berdi. Osy rette aıta keteri, qazaq ertegileri búldirshinderge arnalǵan lıtvalyq radıoda efırge beriledi dep kútilýde. 

Jaqyn kúnderi, qazaq ertegileriniń jınaǵynyń júzdegen danasy Lıtva kitaphanalary men mektepterine taratylady.
 

Sonymen qatar, kitappen 2019 jyly aqpanda ótetin «Vilnius Book Fair» kitap jármeńkesinde tanysýǵa bolady. Bul jerde, jınaqtyń resmı tusaýkeseri de ótedi.