Vılnıýs turǵyny balkonǵa KSRO týyn ilip qoıǵany úshin tutqyndaldy
ASTANA. 25 shilde. QazAqparat - Vılnıýstik zerger Arvıdas Gýrıavıchıýs óz balkonyna Keńes odaǵy men keńestik Armenııanyń týlaryn ilip qoıǵany úshin tutqyndaldy, dep habarlaıdy Lenta.rý Delfi.lt.-ǵa silteme jasaı otyryp.
Oǵan keńestik rámizderdi ashyq túrde dáripteýge tyıym salǵan zańdy buzdy degen aıyp taǵylýda.
Oqıǵa 22 shildede, jeksenbi kúni oryn alǵan. Al 21 shilde Lıtvanyń KSRO quramyna kirgen kúni retinde tarıhta qalǵan bolatyn. Alaıda, Gýrıavıchıýs týlardy basqa maqsatta ilgendigin aıtyp aqtalýda.
Zergerdiń aıtýynsha, ol jeksenbi kúni bazarǵa baryp, sol jerde kezdeısoq bir kollektsııa jııýshymen tanysqan. Ol óz kezeginde budan keńestik týlardy satyp almaqshy bolady. Sóıtip ekeýi zergerdiń úıine kelip, bólmeniń ishi tar boǵandyqtan, týlardy anyǵyraq kórý úshin balkonǵa shyǵaryp ilgen-mys.
«Dál sol kezde zergerdiń dos qurbysy telefon shalyp, sınagoga jaqta turǵanyn, qolynda aýyr sómkeleri bar ekenin aıtyp, kómekke shaqyrǵan, - dep jalǵastyrady oqıǵany jergilikti BAQ. - Zerger qurbysyna kómektesý úshin dalaǵa asyǵys shyǵyp ketip, qaıtyp oralsa, satyp alýshynyń ornynda polıtseıler otyrǵan».
Keıin bilgili bolǵandaı, Vılnıýstiń bir turǵyny balkonda ilinip turǵan keńestik týlardy kórip, qatty ashýlanǵan. Polıtsııany shaqyrǵan da sol eken.
Zerger jergilikti polıtsııa bólimine jetkizilip, ákimshilik jaýapqa tartyldy. Endi ol 500-1000 lıt (175-350 dollar) kóleminde aıyppul tóleýi múmkin.
Lıtvada keńestik jáne natsıstik rámizderdi dáripteýge 2008 jyldan bastap tyıym salynǵan. KSRO týy, sondaı-aq oraq pen balǵa, qyzyl besburyshty juldyz sııaqty kezindegi keńestik sımvolıkalar Lıtvada zańmen qýdalanady. Tipti, keńestik basshylardyń portretterine de munda qatań tyıym salynǵan.
Negizinen bul tyıymdar túrli mıtıngiler men basqa da jappaı sharalarǵa qoldanylady. Degenmen, osyndaı jekelegen jaǵdaılarda da Lıtva basshylyǵy keńestik dáýirdi kókseýshilerdi aıamaıdy. Máselen, jýyrda Vılnıýste kóligine keńestik týdy ilip alǵan júrgizýshi ustalyp, aıyptaldy. Al Panevejde taǵy bir júrgizýshi kóligine oraq pen balǵanyń sýretin jabystyryp júrip qolǵa túsken. Svırplıaı aýylyndaǵy bir skladtyń qabyrǵasyna Lenınnniń sýretin salǵan nemese Shıaýlıaıda oıynshyq qyzyl áskerlerdi jınap júrgen pysyqaılar da polıtsııadan tıisti jazalaryn alǵan.
