Vıktor Mozes: «Qaısardy» tańdaýyma alǵa qoıǵan maqsaty áser etti

ASTANA. KAZINFORM — Aǵylshyn Premer-lıgasynda oıyn kórsetken nıgerııalyq Vıktor Mozes bıyl Qyzylordanyń «Qaısar» komandasynyń namysyn qorǵaıdy. Kazinform tilshisi nıgerııalyq fýtbolshynyń aldaǵy maqsaty men Qazaqstanǵa kelýi jóninde oı-pikirin bilgen edi.

— Aldymen Qazaqstanǵa qosh keldińiz demekpiz. Jankúıerler sizdi Anglııanyń «Lıverpýl» jáne «Chelsı» klýbtarynda dop tepkenińdi jaqsy biledi. Qyzylordalyq «Qaısar» jeıdesin kııýge kelisim berýińizdiń basty sebebi nede?

— Maǵan usynyspen shyqqan komandalar az bolǵan joq. Árıne, árbir fýtbolshy ózine qolaıly nusqany qalaıdy. Men «Qaısar» ókilderine jolyqqan sátte komandanyń alǵa qoıǵan maqsaty jóninde bildim. Qyzylorda qalasynda byltyr jańa stadıon paıdalanýǵa berilgenin estidim. Oǵan qosa bıyl aldyna joǵary maqsat qoıyp otyr eken. Bul jobalar meni qyzyqtyrdy. Sol maqsatty júzege asyrý úshin óz úlesimdi qosýǵa sheshim qabyldadym. Oǵan esh ókingen emespin. Osylaısha maǵan jańa múmkindikke jol ashyldy. Komandamen birge úlken jetistikke qol sozamyn degen oıdamyn. Aldaǵy ýaqytta «Qaısardyń» Túrkııadaǵy oqý-jattyǵý jıynyna baramyn. Onda fýtbolshylarmen tanysyp, tájirıbemdi arttyra túsemin degen oıdamyn.

Taǵy bir aıta keterligi, komanda byl akademııa ashýǵa nıet tanytyp otyr eken. Bul maqsatta jańadan qurylystar boı kóterip, fýtbol alańdary salynatynyn estidim. Endigi kezekte Qyzylordada jas talanttarǵa jol ashylyp, óz eliniń ataǵyn shyǵarýǵa kúsh salatynyna kózim aıqyn jetedi.

— Ózińiz jaıly qysqasha aıtyp berseńiz. Fýtbolǵa qalaı keldińiz?

— Men 1990 jyly Nıgerııanyń Lagos qalasynda dúnıege keldim. Anglııanyń «Krıstal Pelas» komandasynyń túlegimin. Aldymen sol klýbta 2007 jyly mansabyn bastap, odan keıin «Ýıgan Atletık», «Chelsı», «Lıverpýl», «Stok sıtı», «Vest Hem ıÝnaıted», «Lýton Taýn», Túrkııanyń «Fenerbahche», Italııanyń «Inter», Reseıdiń «Spartak» klýbtarynda dop teptim. 2012-2018 jyldary Nıgerııa ulttyq quramasynyń namysyn qorǵadym.

— Sizdiń qorǵanys jáne jartylaı qorǵanys shebinde oınaı alatynyńyzdy bilemiz. Ózińiz alańnyń qaı shebinde bolǵanyńyzdy qolaıly dep baǵalaısyz?

— Alǵashqy mansabymdy bastaǵan sátte negizinen qorǵaýshy boldym. Árıne, bapkerler meni óz komandasynda qaı shepten kórgisi keletinin aldyn ala aıtyp júrdi. Sondyqtan men úshin qaı-qaısysy da oń jambasyma keledi dep oılaımyn. Jalpy, fýtbolshy úshin ámbebap bolǵan artyq emes. Bul oǵan qosymsha múmkindikke jol ashady. 

Aldaǵy ýaqytta «Qaısar» sapynda joǵary jetistikke qol sozsam degen maqsatym bar. Sondyqtan bas bapker meni qaı shepten kórgisi kelse, soǵan beıimdelýge tyrysamyn.

— Aldaǵy ýaqytta Qazaqstan Premer-lıgasynda qansha gol salýdy josparlap otyrsyz?

— Mende ol jóninde ázirge naqty jospar joq. Ony jankúıerler ýaqytynda kóre jatady. Basty maqsatym — komandanyń árbir oıynynda jeńiske úles qosý. «Qaısardyń» bıylǵy josparyna kóz salyp kórsek, jankúıerdiń kóńilinen shyǵýǵa kúsh salamyz dep aıta alamyz. Oǵan barlyq fýtbolshynyń tájirıbesi, sheberligi, jaýapkershiligi jetedi degen oıdamyn.

— Qyzylorda jazy ystyq aýa raıymen erekshelenedi. Bul siz úshin qıyndyq týǵyzbaı ma?

— Fýtbolshy eshqandaı aýa raıyna qaramaıdy. Meıli, ol sýyq bolsyn, ystyq bolsyn. Jasyl alań tórinde jaqsy oınap, óz komandańnyń jeńisine úles qosý — basty mindetimiz. Men qansha jyldan beri oınap kelemin. Kezdesý barysynda talaı aýa raıynyń qolaısyzdyǵyn kórgen edik. Barlyǵynda kópshilik kóńilinen shyǵýǵa tyrystyq. Sol maqsatymyzǵa jettik. Ol jaıynda komanda ókilderi de aıtty. Sondyqtan kez kelgen aýa raıynda oıyn kórsetýge daıynmyn dep aıta alamyn.

Sondaı-aq men dúnıege kelgen Nıgerııa da ystyq aýa raıymen erekshelenedi. Bul — Afrıka qurlyǵyndaǵy kóptegen elge tán tabıǵat qubylysy.

— Jergilikti jankúıerlerdiń qarsy alýy qalaı boldy?

— Qyzylordalyq jankúıerler óz komandasynda árdaıym qoldaý bildiredi degen senimdemin. Ony tanystyrý barysynda da baıqadym. Stadıonda úsh myńnan astam adam jınalǵan eken. Olardyń tarapynan maǵan qoldaý erekshe boldy. Aldaǵy ýaqytta qyzylordalyq jankúıerlerdiń senimin aqtaýǵa tyrysamyn.

— Ózińizben birge álemge tanymal fýtbolshylardyń bıyl Qazaqstan Premer-lıgasynda oıyn kórsetýge nıet tanytyp jatqanyn estigen shyǵarsyz. Bul jóninde ne aıtasyz?

— Tájirıbeli oıynshylar árbir chempıonattyń joǵary deńgeıde damýyna oń áserin tıgizedi degen senimdemin. Men ony qoldaımyn. Bul jergilikti jastardyń sheberligin jetildirýge óz áserin tıgizedi. Keleshekte álemge tanymal fýtbolshylar kóbirek keledi degen oıdamyn.

— Qyzylorda qalasyn kórgende alǵan alǵashqy áserińiz qandaı? Qala unady ma?

— Syrttan kirip kele jatqanda qalanyń damýyna kóz salyp qarap kórdim. Qanshama jańa ǵımarattar boı kóterip jatqanyn baıqadym. Bul árbir eldiń áleýetin baıqatady. Qyzylorda óte shaǵyn qala bolsa da, damýy jaǵynan maǵan óte unady. Óte tynysh qala sekildi. Meniń ózim negizinen tynyshtyqty jaqsy kóremin. Sondyqtan Qyzylorda meni osy jaǵynan erekshe baýrap aldy dep sanaımyn. Aldaǵy ýaqytta qalany aralap kóremin. Qyzylordamen jaqyn tanysamyn.

— Qyzylordalyq jankúıerlerge qandaı tilek aıtasyz?

— Aldaǵy maýsymda bizge qoldaý bildirińizder degim keledi. Árbir fýtbolshy úshin jankúıer senimi erekshe dep sanaımyn.

— Áńgimeńizge raqmet.