Vıktor Hrapýnov jaıynda aqparat bergender qarjylaı yntalandyrylýy múmkin - Qarjy polıtsııasy
ASTANA. 4 qyrkúıek. QazAqparat - Vıktor Hrapýnov jaıynda aqparat bergender qarjylaı yntalandyrylady. Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı aıtty.
«Bul is tergelip jatyr. Eger de atalǵan is boıynsha bireý aqparat bere alatyn bolsa, onda erejege sáıkes qandaı da bir yntalandyrý bolýy múmkin. Alaıda, kóp habar túsip jatsa, onda qylmystyq isti ashýǵa mańyzy barlary ǵana eskeriledi», - dep atap ótti resmı ókil.
Budan buryn habarlanǵandaı, Vıktor Hrapýnovtyń izdestirilip jatqandyǵy týraly habar Interpol halyqaralyq polıtsııa uıymynyń saıtynda jarııalandy. Almaty qalasynyń eks-ákimi Vıktor Hrapýnovqa Qarjy polıtsııasy byltyr 20 qylmystyq is qozǵaǵan bolatyn. Hrapýnov laýazymdyq ókilettigin asyra paıdalanyp, iri mólsherde para alǵan. Zańsyz jolmen túsirgen qarjyny jáne bótenniń múlkin zańdastyrǵan. Tipti munymen shektelmeı, uıymdasqan qylmystyq toptardy qarjylandyrýǵa deıin barǵan. Sondyqtan da sot ony qamaýǵa alýǵa sanktsııa berdi. Osyǵan baılanysty oǵan halyqaralyq izdeý de jarııalandy.
Aıta keteıik, búgin Qarjy polıtsııasynda ótken brıfıngte Jemqorlyq faktisin habarlaǵan adamdar qarjylyq túrde yntalandyrlatyny habarlandy. «Aǵymdaǵy jylǵy 23 tamyzda QR Úkimetiniń qaýlysymen sybaılas jemqorlyq quqyq buzýshylyq faktysy týraly habarlaǵan nemese jemqorlyqqa qarsy kúreste ózge de jolmen járdemdesken adamdardy kótermeleý qaǵıdalary bekitildi», - dep atap ótti resmı ókil.
Bul qaǵıdalar jemqorlyqqa qarsy kúreste járdemdesetin adamdardy yntalandyrý tártibin anyqtaıdy. Sondaı-aq, onyń sózine qaraǵanda, atalǵan yntalandyrý qarjysyn alý maqsatynda jalǵan aqparat habarlaǵan azamattar elimizdiń zańdaryna sáıkes jaýapkershilikke tartylady.
