Vıktor Demıanenko: Golovkın jeńýge mindetti
ASTANA. QazAqparat - Qazaqstan kásibı boks federatsııasynyń vıtse-prezıdenti Vıktor Demıanenko «QazAqparat» HAA tilshisimen telefon arqyly baılanys kezinde alda ótetin qazaqstandyq Gennadıı «GGG» Golovkın men meksıkalyq Saýl «Kanelo» Alvares jekpe-jegine qatysty pikirin bildirdi.
Burynǵy belgili boksshynyń oıynsha, Denıel Djeıkobspen jekpe-jekke qaraǵanda, GGG bul aıqasty múlde basqasha ótkizýge tıis.
«Men bizdi óte tartysty aıqas kútip turǵandyǵyn sezemin. Bizdiń biletinimizdeı, Golovkın myqty boksshy. Kanelo da osal emes. Meksıkalyq boksshynyń tehnıkalyq jaǵynan meńgergenderi kóp. Golovkın sońǵy Djeıkobspen aıqasynda biraz «qysylyńqyrap» júrdi, Kanelomen jekpe-jekte kóbirek soqqy berý kerek, sonda bári biz kútkendeı aıaqtalady dep oılaımyn», - dedi sarapshy.
«GGG»-diń qarsylasy jaıly sóz qozǵaǵan Demıanenko Kanelonyń osal emestigin atap ótti.
«Onyń jeńisti ońaı bere qoımasy anyq. Óıtkeni, Golovkınniń barlyq tıtýldary onda da bar. Meksıkalyq boksshyny jeńý úshin Golovkınge barlyq kúshin salýǵa týra keledi. Men Alvarestiń sońǵy aıqasyn qarap shyqtym, ol «aıaqpen» jaqsy jumys isteıdi, soqqylardan qalaı qashý kerektigin biledi jáne jaǵdaıdy baqylaýda ustaı alady», - dedi KBF-ynyń ókili.
«Kanelo taktıkalyq turǵydan jaqsy daıyndalǵan dep oılaımyn. Ókinishke oraı men Golovkınniń daıyndyqtaryna qatysa almadym, sol sebepti onyń aıqas jaıly strategııalaryn da aıta almaımyn. Biz daıyndyq barysyn kórmegendikten, eki boksshynyń aıqasqa daıyndyǵy jaıly baǵa berýimiz durys bola qoımas. Biraq ekeýi de jekpe-jekke daıyn dep oılaımyn. Árqaısysy jan-jaqty qarýlanyp shyǵýy tıis», - dedi Demıanenko.
Soǵan qaramastan, Demıanenko otandasymyzdyń jeńisinen úmitti.
«Golovkın jeńýge mindetti. Óıtkeni, onyń áýesqoılyq mektebi myqty.
