Vıkıpedıashylar arasynda «Vıkı jarys» konkýrsy jarııalandy
ALMATY. 16 maýsym. QazAqparat /Erbol Azanbek/ - Qazaq tildi vıkıpedıashylar arasynda «Vıkı jarys» konkýrsy jarııalandy. Bul týraly búgin Almatyda ótken baspasóz máslıhatynda "Wikibilim" qoǵamdyq qorynyń quryltaıshysy Raýan Kenjehanuly aıtty.
Atalǵan konkýrsqa "Nokia" kompanııasy qoldaý ári demeýshilik tanytqan. Búginnen bastalatyn konkýrsqa barlyq nıet bildirgen "vıkıpedııashylar" qatysa alady. Báıge "Eń belsendi redaktor" jáne "Eń úzdik maqala" atalymdary boıynsha ótedi. Alǵashqy atalym boıynsha "Vıkıpedıa" maqalalaryn óńdeýge qatysqan, reıtıngi joǵary 40 adam jeńimpaz tanylady. Ekinshi atalym boıynsha qorytyndy shyǵarylar aldyndaǵy 10 aptanyń úzdik maqalasy anyqtalady, osy 10 maqalanyń avtorlary úzdik maqala báıgesiniń jeńimpazy bolmaq. Atalǵan eki báıgeniń jeńimpazdary "Nokia" kompanııanyń smartfondaryna ıe bolady. Báıge qorytyndysy 2011 jyldyń 16 jeltoqsanynda shyǵarylady.
Esterińizge sala keteıik, Vıkıpedıa entsıklopedııasyna maqala qosyp nemese óńdeýge qatysyp júrgenderdiń barlyǵy vıkıpedıashy atalady. Bul sanatqa kez-kelgen adam qosyla alady. Vıkıpedıashy atanyp, vıkı báıgesine qatysý úshin "Wikipedia" ashyq entsıklopedııasynyń www.kk.wikipedia.org qazaqsha betinde tirkelip, qazaq tilinde kem degende 1000 sapaly maqalany Wikipedia-ǵa salý, sondaı-aq ózińiz týraly málimetterdi wikibaige@wikibilim.kz adresine joldaý qajet.
Maqaladaǵy sózderdiń sany 500-den kem bolmaýy kerek. Maqalada kem degende bir taqyryppen baılanysty sýret bolýy shart. Maqala tolyǵymen vıkılendirilgen (maqala taraýlarǵa bólinip, ishki jáne syrtqy siltemeler jasalyp, avtor nemese paıdalanylǵan ádebıet, maqalanyń sanaty jáne t.b. kórsetilýi shart) bolýy kerek. Tolyq erejelerdi www.kk.wikipedia.org saıtynyń "anyqtama" bóliminen jáne www.wikibilim.kz saıtynan tabýǵa bolady.
