Vıkıpedıanyń qazaq tilindegi reıtıngi 25-orynǵa kóterildi
ASTANA. 19 jeltoqsan. QazAqparat - Búgin Astanada «Qazaqsha vıkıpedıa» jobasyna arnalǵan baspasóz máslıhaty ótti.
Bir jarym jyldyń ishinde jobanyń qazaqtildi materıaldardyń sany 20 ese ósip, 200 myń maqalaǵa jetti. Al maqalalardy jazýǵa jáne oǵan redaktorlyq jasaýǵa belsendi ári turaqty túrde aralasyp júretin paıdalanýshylardyń sany 230 adam boldy. «WikiBilim» qoǵamdyq qorynyń basshysy Raýan Kenjehanulynyń atap ótkenindeı, osy kórsetkishterdiń arqasynda qazaq tili Vıkıpedıa tilderi arasynda 127-orynnan 25-orynǵa joǵarylady.
«Jobanyń basty maqsaty - Vıkıpedıa jahandyq entsıklopedııasynda qazaq tilindegi taraýdy damytý. Entsıklopedııa maqalalary paıdalanýshylardyń redaktorlyǵymen qoıylady. Jobanyń bastapqy kezeńinde entsıklopedııanyń qazaqsha maqalalar sany 7 myńnan, redaktorlardyń sany 4 adamnan aspaǵan edi», - deıdi ol.
Onyń aıtýynsha, qazaqsha vıkıpedıa maqalalary aıyna 8 mıllıon ret oqylady. Eń joǵary kórsetkish qyrkúıek aıynda baıqalǵan. Ol kezde qazaqsha vıkıpedıanyń betteri 10 mıllıon ret qaralǵan.
«Qazaqsha vıkıpedıanyń damýyna «Qazaqstan» ulttyq entsıklopedııasynyń redaktsııasy úlken úles qosty. Olar bizdiń elektrondy kitaphanaǵa 50 myńnan astam materıal syıǵa tartty», - dep túıindedi sózin R.Kenjehanuly.
