Vıkıngter baılyǵy: Norvegııa jerinen XI ǵasyrdyń eń iri qazynasy tabyldy
ASTANA. KAZINFORM – Norvegııanyń shyǵysynan XI ǵasyrǵa jatatyn shamamen 3 myń kúmis tıynnan turatyn qazyna tabyldy, dep habarlaıdy MIR24.
Alǵashqy tıyndardy metall izdegish quraldyń kómegimen áýesqoı arheologtar anyqtaǵan. Olar bul týraly ǵalymdarǵa habarlaǵannan keıin keń aýqymdy qazba jumystary bastalyp, birneshe kún ishinde jer astynan myńdaǵan tıyn shyǵaryldy. Mamandardyń aıtýynsha, bul – Norvegııada tabylǵan vıkıng dáýirindegi eń iri qazynalardyń biri.
Tıyndar jaqsy saqtalǵan. Sarapshylar muny topyraq quramynyń ereksheligimen túsindiredi – onda tastar óte az bolǵandyqtan, artefaktiler tozýdan aman qalǵan.
Tabylǵan qazyna «Merstad qazynasy» dep ataldy. Ol vıkıng dáýiriniń sońǵy kezeńine, shamamen 1050 jyldarǵa jatady. Tabylǵan tıyndardyń basym bóligi Anglııa men Germanııada soǵylǵan. Ǵalymdar mundaı tıyndar sol kezeńde Soltústik Eýropanyń kóptegen óńirinde ortaq kúmis valıýta retinde qoldanylǵanyn aıtady.
Bul olja vıkıng dáýirindegi Norvegııanyń oqshaý bolmaǵanyn, kerisinshe, eýropalyq saýda jelilerine qatysqanyn kórsetedi.
Eń mańyzdy oljalardyń biri retinde norvegııalyq tıyndar ataldy. Olar qazyna kómilgenge deıin, shamamen 1045 jyldary soǵylǵan. Qazynanyń ne sebepti kómilgeni belgisiz. Ǵalymdardyń pikirinshe, vıkıng dáýirinde adamdar aqshany saqtaý úshin jerge kómip otyrǵan, alaıda bul jaǵdaıda ıesi ony qaıta alyp ketpegen.
Aıta keteıik, bıyl arheologter Mysyrda Ejelgi patshalyq dáýirine tıesili qabirlerdi tapqanyn jazdyq.
