VIII saılanǵan Májilis depýtattary ant berdi
«Qazaqstan halqyna adal qyzmet etýge, Qazaqstan Respýblıkasynyń tutastyǵy men Táýelsizdigin nyǵaıtýǵa, onyń Konstıtýtsııasy men zańdaryna qatań baǵynýǵa, depýtattyń ózime júktelgen mártebeli mindetterin adal atqarýǵa ant etemin», - delingen ant mátininde.
Buǵan deıin VIII saılanǵan Májilis depýtattarynyń tolyq tizimi jarııalanǵan bolatyn.
19 naýryz kúni ótken Májilis depýtattaryn saılaýǵa elimizde resmı tirkelgen 7 partııanyń barlyǵy qatysty. Olardyń ishinde tek «Baıtaq» partııasy ǵana shekti 5 paıyzdyq mejeden asa almady. Al, «Amanat» partııasy saılaýshylardyń – 53,90, «Aýyl» halyqtyq-demokratııalyq partııasy – 10,90, «Respublica» partııasy – 8,59, «Aq jol» Qazaqstan demokratııalyq partııasy – 8,41, «Qazaqstan halyq partııasy» – 6,8, «Jalpyulttyq sotsıal-demokratııalyq partııasy» 5,20 paıyz daýysyn jınady. Osylaısha, 5 jáne odan da kóp paıyz daýys jınaǵan saıası partııalardyń arasynda «Amanat» partııasyna - 40 mandat, «Aýyl» halyqtyq-demokratııalyq partııasy – 8 mandat, «Respublica» partııasy – 6 mandat, «Aq jol» Qazaqstan demokratııalyq partııasy – 6 mandat, «Qazaqstan halyq partııasy» – 5 mandat, «Jalpyulttyq sotsıal-demokratııalyq partııasyna» 4 mandat buıyrdy.
