VIII Halyqaralyq taý-ken metallýrgııa kongresi óz jumysyn bastady
ASTANA. QazAqparat - Elordadaǵy Táýelsizdik saraıynda VIII Halyqaralyq taý-ken metallýrgııa kongresi óz jumysyn bastady, dep habarlaıdy QazAqparat.
«Elbasy Nursultan Ábishuly Nazarbaev elimizdiń metallýrgııa salasyna erekshe nazar aýdaryp keledi. Memleket basshysy Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýynda taý-ken metallýrgııa salasynyń el ekonomıkasynyń damýyn qamtamasyz etýdegi strategııalyq rólin atap ótti. Prezıdenttiń kóregen saıasatynyń arqasynda taý-ken salasynda iri jobalar júzege asyp, qazir sala turaqty damý jolynda», - dedi kongresstiń ashylý rásiminde sóz sóılegen QR Premer-Mınıstriniń birinshi orynbasary Asqar Mamın.
Sonymen qatar ol Qazaqstan mıneraldy shıkizat qorlaryna baı ekendigin jáne osy kórsetkish boıynsha álemniń alǵashqy ondyǵyna kiretindigin atap ótti.
«Taý-ken metallýrgııa salasy Qazaqstannyń ındýstrııaldy-ınnovatsııalyq damýyna úlken úles qosyp keledi. Kongress jumysy barysynda taý-ken salasynyń ózekti máseleleri talqylanady. Kongress memlekettik organdar men iskerlik orta ókilderi pikir almasatyn halyqaralyq deńgeıdegi sharaǵa aınaldy», - dedi Mamın.
Aıta keterligi, kongress aıasynda «Altyn Gefest» ulttyq salalyq syılyǵyn tabystaý sharasy ótedi. Bul syılyqty elimizdiń Investıtsııalar jáne damý mınıstrligi taý-ken metallýrgııa salasynyń kóshbasshylaryn yntalandyrý jáne qazaqstandyq kompanııalardyń qoǵam ishindegi tanymaldylyǵyn arttyrý maqsatynda bekitken bolatyn. Syılyq bıyl 8-ret tabys etiledi.
